ဖြူးမြိုရှိ အလှူအိမ်တွင် ဆက်ကြေးတောင်း၍ ပြန်လာသည့် စစ်ကောင်စီ လက်အောက်ခံ ရဲတပ်ဖွဲ့ဝင်များ မိုင်းဆွဲတိုက်ခိုက်ခံရပြီး နယ်ထိန်းရဲအပါအဝင် ၄ ဦးဒဏ်ရာရ

ဧရာဝတီတိုင်းမ်

(ဖြူး)၊ ဖေဖော်ဝါရီလ ၂၇ ရက်

ပဲခူးတိုင်း၊ တောင်ငူခရိုင်၊ ဖြူးမြို့နယ်တွင် ဘုရားလဟာကျေးရွာ အုပ်ချုပ်ရေးမှူး၏ အလှူအိမ်မှ ဆက်ကြေး‌တောင်း၍ပြန်လာသည့် စစ်ကောင်စီလက်အောက်ခံ ရဲတပ်ဖွဲ့ဝင်များကို ယမန်နေ့ဖေဖော်ဝါရီလ ၂၆ ရက်နေ့ နေ့လယ် ၁၂ နာရီဝန်းကျင်တွင် ဖြူးမြို့နယ်(ပကဖ) ဗိုလ်ကျားကြီးအဖွဲ့က ကြားဖြတ်တိုက်ခိုက်ခဲ့ကြောင်း သိရသည်။

အလှူအိမ်မှ ဆက်ကြေး‌တောင်းကာ ပြန်လာသည့် ရဲတပ်ဖွဲ့ဝင်များကို  ကညွတ်ကွင်းမြို့ အရှေ့ဘက်တွင် မိုင်းဆွဲတိုက်ခိုက်၍ လက်နက်ငယ်များဖြင့်ထပ်မံ ကြားဖြတ် တိုက်ခိုက်ခဲ့ရာ နယ်ထိန်းရဲသန့်စင်အောင်၏ ဦးခေါင်းကျည်ထိမှန်(စိုးရိမ်ရ) ဒဏ်ရာ ရရှိခဲ့ပြီး ကျန်ရဲတပ်ဖွဲ့ဝင် ၃ ဦးလည်း ဒဏ်ရာရရှိခဲ့ကြောင်း Bago Region PDFထံက သိရသည်။

"အုပ်ချုပ်ရေးမှူးရဲ့အလှူပွဲအတွက် စစ်ကောင်စီလက်အောက်ခံတွေကိုလုံခြုံရေး ငှားထားတာ။ စစ်ကောင်စီတပ်ဖွဲ့ဝင်တွေဆို ၂ သိန်း၊ ရဲကိုတစ်သိန်း ပေးပြီး ငှားခဲ့တာလို့သိရတယ်။ နယ်ထိန်းရဲကတော့ ကျည်ထိတဲ့ဒဏ်ရာစိုးရိမ်ရပြီး နေပြည်တော်ဆေးရုံမှာ တင်ထားရ တယ်လို့သိရတယ်" ဟု ပဲခူးတိုင်း PDFပြန်ကြားရေးတာဝန်ရှိသူက ဧရာဝတီတိုင်းမ်ကို ပြောသည်။

ကြားဖြတ်တိုက်ခိုက်ရာတွင် စစ်ကောင်စီလက်အောက်ခံ ရဲတပ်ဖွဲ့ဝင်မှုများမှ ပြန်လည်ပစ်ခတ်မှုကြောင့် အပြန်အလှန်ပစ်ခတ်မှုဖြစ်ပွားခဲ့ပြီး ပြည်သူ့ကာကွယ်ရေး တပ်ဖွဲ့ဝင်များမှ လုံခြုံစွာဆုတ်ခွာနိုင်ခဲ့ကြောင်း သိရသည်။

ဖြူးမြို့နယ်တွင် ပြီးခဲ့သည့် ဖေဖော်ဝါရီ ၁ ရက်နေ့ကလည်း စစ်ကောင်စီ သတင်းပေးတစ်ဦးဖြစ်သူ မြပဲခူးရွာ အုပ်ချုပ်ရေးမှူးညွန့်ဝင်းကို ဖြူးမြို့နယ်ပကဖ (အမှန်တရားမြတ်နိုးသူများအဖွဲ့)က ပစ်ခတ်ရှင်းလင်းခဲ့သည်။

#ပဲခူးတိုင်း #ဖြူမြို့နယ် #အလှူအိမ်  #ဆက်ကြေး #ရဲတပ်ဖွဲ့  #မိုင်းဆွဲ #၄ဦးဒဏ်ရာရ #Ayeyarwaddy_Times