၂ဝ၂၃ ခုနှစ်အတွင်း မြန်မာနိုင်ငံကို လူသားချင်းဆိုင်ရာစာနာမှုအကူညီအဖြစ် ယူရို (၁၈)သန်းကူညီပေးမည်

ဂျန်ဇက် (NP News) - ဖေဖော်ဝါရီ ၄

ဥရောပသမဂ္ဂ(EU)သည် ၂ဝ၂၃ ခုနှစ်အတွင်း မြန်မာနိုင်ငံကို လူသားချင်းဆိုင်ရာစာနာမှုအကူညီအဖြစ် ယူရို (၁၈)သန်းကူညီထောက်ပံ့fပေးသွားမည်ဖြစ်ပြီး အဆိုပါငွေကြေးကို အစိုးရထံတိုက်ရိုက်လှူဒါန်းမည်မဟုတ်ဘဲ လူသားချင်းဆိုင်ရာစာနာမှုအကူညီပေးရေးလုပ်ငန်းများလုပ်ကိုင်နေသော မိတ်ဖက်အဖွဲ့အစည်းများမှတဆင့် ကူညီလှူဒါန်းသွားဖွယ်ရှိနေကြောင်းသိရသည်။ 

EU သည် အဆိုပါငွေကြေးကို နေရပ်စွန့်ခွာထွက်ပြေးသူများ၊ ပဋိပက္ခကြောင့်ထိခိုက်လွယ်သူများအတွက် အစားအစာ၊ အကာအကွယ်ပေးရေး၊ အမိုးအကာ၊ ပညာရေးစသော အသက်ကယ်ထောက်ပံ့ပေးမှုများအတွက် အသုံးပြုကူညီသွားမည်ဖြစ် ကြောင်းသိရသည်။ 

EU ၏အခက်အခဲများ စီမံခန့်ခွဲရေးဌာနကော်မရှင်နာက"အာဏာသိမ်းမှုဖြစ်ပွားခဲ့ပြီးနောက်ပိုင်းကတည်းက မြန်မာနိုင်ငံမှာ လူသားချင်းဆိုင်ရာစာနာမှုအကူအညီများလိုအပ်မှုတိုးလာခဲ့တယ်။ EU ဟာ ပဋိပက္ခဖြစ်ပွားမှုရဲ့သက်ရောက်မှုတွေ၊ ဒေသအတွင်း သဘာဘေးအန္တရာယ်တွေ့ကြုံရသူတွေအပြင် ဒုက္ခသည်များကိုလက်ခံထားတဲ့နိုင်ငံတွေနဲ့ နေရပ်စွန့်ခွာထွက်ပြေးသူတွေကို ကူညီထောက်ပံ့ပေးဖို့အမြဲတမ်း ရပ် တည်သွားမယ်လို့ ကတိပြုပါတယ်" ဟုပြောဆိုထားသည်။

၂ဝ၂၃ ခုနှစ်တွင် မြန်မာနိုင်ငံရှိ လူပေါင်း (၁၇ ဒသမ ၆)သန်းသည် လူသားချင်းဆိုင် ရာစာနာမှုအကူအညီများလိုအပ်မည်ဖြစ်ကြောင်း ကုလသမဂ္ဂအဖွဲ့က ခန့်မှန်းထား သည်။

EU သည်အာဏာရယူမှုဖြစ်ပွားခဲ့သော ၂ဝ၂၁ ခုနှစ်နောက်ပိုင်းကတည်းက မြန်မာနိုင်ငံကို လူသားချင်းဆိုင်ရာစာနာမှုအကူအညီအဖြစ် ယူရို (၆၈)သန်း ကူညီထောက်ပံ့ပေးထားကြောင်းသိရသည်။ EU သည် မြန်မာနိုင်ငံကို ၁၉၉၄ ခုနှစ်နောက် ပိုင်းကတည်းက လက်ရှိအချိန်အထိ လူသားချင်းဆိုင်ရာစာနာမှုအကူညီအဖြစ် ယူရို (၃၁၆)သန်းကူညီထောက်ပံ့ပေးထားကြောင်းသိရသည်။