လူယုတ်မာ ဝန်ကြီး စိုးထွဋ်၊ မိန်းမ နီလာစိန်၊ သား စည်သူထွဋ်တို့၏ နိုင်ငံနှင့် ပြည်သူများအပေါ် အနိုင်ကျင့် ဖိနှိပ်ယုတ်မာမှုများကို ဖော်ထုတ်ခြင်း

(အပိုင်း-၂) ဖတ်ရန်နှိပ်ပါ

 ▪️ စစ်ဗိုလ်ချုပ် သားကို သတ်ရန် ကြိုးစားသော်လည်း အရေးယူ မခံရသည့် လူရမ်းကား စည်သူထွဋ်(နိဂုံး)ဖတ်ရန်နှိပ်ပါ

(အပိုင်း-၁) 

By ရန်ကုန်ခေတ်သစ်

မင်းအောင်လှိုင် မိသားစုလိုပဲ တိုင်းပြည်ကို ဖျက်ဆီးနေတဲ့ မိသားစုကို ပြပါဆိုရင် နေပြည်တော်မှာရှိတဲ့ ဝန် ထမ်းတွေရော စစ်ဘက်အသိုင်းအ၀ိုင်းတွေက လက်ညှိုးထိုးပြကြမှာက   ဒုဝန်ကြီးချုပ်နဲ့ ပြည်ထဲရေးဝန် ကြီး ဗိုလ်ချုပ်ကြီး စိုးထွဋ် မိသားစုဖြစ်ပါတယ်။ 

ပြည်သူတွေကို ဖမ်းဆီး သတ်ဖြတ်ခြင်း၊ စီးပွားဥစ္စာတွေကို ဖျက်ဆီးခြင်း၊ စစ် ကြောရေးမှာ ပြည်သူတွေကို လူမဆန်စွာ နှိပ်စက်ခြင်း၊ အကျဉ်းထောင်အတွင်း ညှဉ်းပန်း သတ်ဖြတ်ခြင်း၊ ကိုဂျင်မီ၊ ကိုဖြိုးဇေယျာသော် အပါအဝင် နိုင်ငံရေးအကျဉ်းသား ၄ ဦးကို ကြိုးပေးသတ်ဖြတ်ခြင်း စတဲ့ ယုတ်မာရက်စက်တဲ့ စစ်ရာဇဝတ်မှုတွေ၊ လူမဆန်တဲ့ ပြစ်မှုတွေကို  အဓိက ဦးဆောင် ကျူးလွန်နေသူက စိုးထွဋ်ပဲဖြစ်ပါတယ်။ 

စိုးထွဋ်ဟာ မင်းအောင်လှိုင်ရဲ့ မျက်နှာသာ ပေးမှုနဲ့ ကြမ်းပြ ရမ်းပြ "သခင်အားရ ကျွန်ပါး၀" လုပ်ဆောင်နေသူ ဖြစ်တဲ့အပြင် ဝန်ကြီးရာထူးပေးပြီး အရေးပါသူအဖြစ် ဦးစားပေးခံရမှုတွေအတွက် မင်းအောင်လှိုင် ကျေးဇူးကို ခြေသုတ်ပုဆိုး မြေဆွယ်ကျိုးသလို ပေးဆပ်နေသူလည်းဖြစ်ပါတယ်။ 

၂၀၂၀ ခုနှစ် ဖေဖော်ဝါရီလမှာ မင်းအောင်လှိုင်က ပြည်ထဲရေးဝန်ကြီး ကျော်ဆွေကို ရာထူးက အနားပေးပြီး စိုးထွဋ်ကို ဝန်ကြီးရာထူးပေးခဲ့ပါတယ်။ စိုးထွဋ်ဟာ စစ်မျိုးစစ်နွယ် စစ်တပ်အသိုင်းအ၀ိုင်းက ပေါက်ဖွားလာသူဖြစ်ပါတယ်။ ၁၉၆၀ ခုနှစ်မှာ မေးဖွားပြီး ပြည်သူတွေနဲ့ တိုင်းရင်းသား လူနည်းစုတွေအပေါ်  ရက်ရက် စက်စက် စစ်ရာဇဝတ်မှုတွေ ကျူးလွန် သတ်ဖြတ်ခဲ့တဲ့ ဗိုလ်မှူးချုပ် လွန်းမောင်ရဲ့ သားလည်းဖြစ်ပါတယ်။ 

စိုးထွဋ် အဖေက တော့ သူပြုခဲ့တဲ့ မကောင်းမှုတွေကြောင့် ၂၀၀၁ ခုနှစ် န၀တ အတွင်းရေးမှူး၂ ဗိုလ်ချုပ်တင်ဦး၏ ရဟတ်ယာဉ်ပျက်ကျမှု ပါဝင်ပြီး အသေဆိုးနဲ့ သေခဲ့ရပါတယ်။ 

စိုးထွဋ်က ဗိုလ်သင်တန်း အပတ်စဉ် ၆၄ (OTS – 64) ဆင်းဖြစ်ပြီး လက်ရှိအချိန်မှာ အသက် ၆၃ နှစ်ရှိနေပြီ ဖြစ်ပါတယ်။ စစ်တပ်ရဲ့ ရာထူး အစဉ်အလာပေးမှု ဓလေ့အရ  ဘွဲ့ရ ဗိုလ်လောင်းသင်တန်း OTS ဆင်းဖြစ်တာမို့ ရှေ့ဆက်ရာထူးတက်ဖို့လည်း မရှိဘဲ ဂိတ်ဆုံးနေပါပြီ။ 

ဒါပေမယ့်လည်း မင်းအောင်လှိုင်ရဲ့ နေရာပေးမှုကြောင့် ဒုဝန်ကြီးချုပ်နဲ့ ပြည်ထဲရေးဝန်ကြီး ဖြစ်လာတာမို့ အစွမ်းကုန် မီးကုန် ယမ်းကုန် ရက်စက်ပြနေတဲ့ လက်မရွံ့ အာဏာ ပါးကွက်သား အဖြစ် စိုးထွဋ်က အသုံး တော်ခံနေတာလည်းဖြစ်ပါတယ်။ 

စိုးထွဋ်၏ ယုတ်မာမှုများကို ဖော်ထုတ်ခြင်း
========================

၂၀၂၂ ခုနှစ် ဇူလိုင်လအတွင်း ဒီမိုကရေစီအရေး ဦးဆောင်လှုပ်ရှားသူ ကိုဂျင်မီ၊ ကိုဖြိုးဇေယျာသော် အပါ အဝင် ၄ ဦးကို ကြိုးပေးစီရင် သတ်ဖြတ်ရာမှာ စိုးထွဋ်က အဓိက ဦးဆောင်ခဲ့ပါတယ်။ သူကိုယ်တိုင် အင်းစိန်အကျဉ်းထောင်ထဲအထိ လာရောက်ပြီး ကြိုးပေးမှု အစ၊ အဆုံး ကြီးကြပ် ကွပ်ကဲခဲ့တယ်လို့ စစ်ဘက် သတင်းရင်းမြစ်တွေက ပြောပါတယ်။ 

နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကို အကျဉ်းထောင်ထဲထည့်ထားဖို့ ၊ နိုင်ငံတော်သမ္မတကြီး ဦးဝင်းမြင့်ကို တောင်ငူ အကျဉ်းထောင်ပို့ဖို့ ကိစ္စတွေမှာလည်း စိုးထွဋ်က မင်းအောင်လှိုင်နဲ့ တိုက်ရိုက် တိုင်ပင်တယ်လို့ ဆိုပါတယ်။ မင်းအောင်လှိုင်နဲ့ တိုက်ရိုက်တွေ့ပြီး ဖိနှိပ်ရက်စက်ယုတ်မာမှုတွေ ကို စိုးထွဋ်က ကွင်းဆင်း လုပ်ဆောင်နေတာဖြစ်ပါတယ်။  

စစ်အာဏာရှင် ဆန့်ကျင်ရေး ပြည်သူတွေကို စစ်တပ်နဲ့ရဲက ဖမ်းဆီး ရိုက်နှက် သတ်ဖြတ်ဖို့ အဓိက ညွှန်ကြားသူတွေမှာ မင်းအောင်လှိုင်၊ စိုးဝင်း ပြီးရင် တတိယ တာဝန်အရှိဆုံးသူက စိုးထွဋ်ဖြစ်တယ်လို့ စစ်ဘက် သတင်းရင်းမြစ်တွေက ဆိုပါတယ်။ 

"သူက ပြည်ထဲရေးဝန်ကြီးဖြစ်တဲ့အပြင် နစက ကောင်စီဝင်ဖြစ်နေတော့ စစ်တပ်ရော ရဲရော သူက ညွှန်ကြား အမိန့်ပေးလို့ရတယ်။ တစ်နိုင်ငံလုံး စစ်ရေးလှုပ်ရှားမှုနဲ့ပတ်သက်တဲ့ အစည်းအဝေးတွေမှာလည်း သူက ဦးဆောင်ပါဝင်နေတယ်။ အခုနောက်ဆုံး ဒုဝန်ကြီးချုပ် ရာထူးပေးလိုက်တော့ သူရဲ့ အာဏာ စိုးဝင်း နဲ့တန်းတူ မဟုတ်ရင်တောင် စိုးဝင်းထက်မလျှော့ဘူး။ လုံခြုံရေး၊ စစ်ရေး၊ ပြည်ထဲရေး အစည်းအဝေးတွေမှာ သူက  လုပ်ပစ်လိုက်( သတ်ပစ်လိုက်)၊ မှတ်လောက်သားလောက် ဆုံးမရမယ်၊ လုပ်ပြရမယ်( သတ် ဖြတ်ပြရမယ်) ဆိုတာမျိုးတွေ အမြဲတမ်း ပြောပါတယ်။ မင်းတို့ကို ငါအမိန့်ပေးတယ်။ ငါ ညွှန်ကြားတယ် ဆိုတာမျိုး အမြဲပြောတဲ့သူပဲ" လို့ စစ်ဘက်သတင်းရင်းမြစ်က ပြောပါတယ်။ 

မင်းအောင်လှိုင်ကို နိုင်ငံတော် အကြီးအကဲလို့ ခေါ်လေ့ရှိသူ
=================================

စိုးထွဋ်ဟာ မင်းအောင်လှိုင်ကို နိုင်ငံတော်အကြီးအကဲ၊ အကြီးအကဲလို့ အစည်း အဝေးတိုင်းမှာ ခေါ်ဝေါ် သုံးနှုန်းပြောဆိုပါတယ်။ မင်းအောင်လှိုင်ရှေ့ရောက်သွားရင် စိုးထွဋ်ဟာ တကယ့်ကို အရိုက်ကြမ်းတဲ့ ဘုန်းကြီးရှေ့ ရောက်သွားတဲ့ ဘုန်းကြီးကျောင်းသားလို အလွန် ရိုကျိုးတယ်လို့ သိရပါတယ်။
မင်းအောင်လှိုင်ဟာ သူ့ကို လေးစား ရိုကျိုးမှု ပြသူတွေကို အင်မတန် သဘော ကျပါတယ်။ စိုးထွဋ်ရဲ့ ကျိုးနွံ့တဲ့ အမူအရာနဲ့ အပြောအဆိုတွေကြောင့် မင်းအောင်လှိုင်ဟာ နှစ်ထောင်း အားရသလို သူ့မှာ စိုးထွဋ်လို လက်မရွံ့  အာဏာပါးကွက်သားတွေရှိတယ်ဆိုပြီး မာန်တင်းနိုင်တာဖြစ်တယ်လို့ သိရပါတယ်။ 

ပြည်သူပိုင်ပစ္စည်းများကို ချိတ်ပိတ်ခြင်းနဲ့စီးပွားဖျက်ခြင်း
================================

စစ်အာဏာရှင် ဆန့်ကျင်တဲ့ ပြည်သူတွေရဲ့ အိုးအိမ်တွေကို ချိတ်ပိတ်တာ၊ ဖျက်ဆီးတာ၊ စစ်တပ်ပိုင် အဖြစ် သိမ်းယူတာတွေက စိုးထွဋ်ရဲ့ လက်ချက်ဖြစ်ပါတယ်။ စစ်တပ်က ရေးဆွဲပြဋ္ဌာန်းထားခဲ့တဲ့ အကြမ်းဖက်တိုက်ဖျက်ရေး ဥပဒေအရ ဒီလို အိုးအိမ် ဥစ္စာ ပစ္စည်းတွေ ချိတ်ပိတ်၊ ကုန်းကောက်စရာ မရှိအောင် ဆင်းရဲသွားမှ စစ်တပ်ကို မထီမဲ့မြင် မပြုရဲမှာ၊ နားရွက် တွံ့တွေး မဆွတ်ရဲမှာလို့ စိုးထွဋ်က မင်းအောင်လှိုင်က တင်ပြပြီး ပြည်သူ့အိုးအိမ် ပစ္စည်းဥစ္စာတွေကို ဖျက်ဆီးခဲ့တာလည်းဖြစ်ပါတယ်။ 

၂၀၂၂ ခုနှစ် ဇန်နဝါရီလ ၂၅ ရက်နေ့ စစ်ကောင်စီရဲ့ လျှို့ဝှက်အစည်းအဝေးမှာ စိုးထွဋ်က စစ်အာဏာရှင် ဆန့်ကျင်ရေး အသံတိတ် သပိတ်မှာ ပါဝင်သူမှန်သမျှကို စီးပွားပျက်အောင် ဖျက်ဆီးရမယ်လို့ စစ်တပ်နဲ့ရဲကို ညွှန်ကြားခဲ့ပါတယ်။ 

အဲဒီအစည်းအဝေးမှာ စိုးထွဋ် ပြောခဲ့တာကို ပြန်ကြည့်ရအောင်ပါ။ 

"ငါတို့ရဲ့လုပ်ဆောင်မှုကို ပျက်ရယ်ပြုတာ မလေးမစား လုပ်တာဒါကို လက်ခံလို့မရဘူး။  ပြတ်ပြတ်သားသားဆောင် ရွက်ကြဖို့ ဖြစ်ပါတယ်။  အရေးယူတဲ့အခါ ပြတ်ပြတ်သားသား အရေးယူရမယ်။ ကြီးသောအမှုကို ငယ်စေ ငယ်သောအမှုကို ပပျောက် စေဆိုတာက ဒါက ဒါနဲ့ မဆိုင်ဘူး။  အဲဒါကို မင်းတို့ နားလည်ဖို့လိုတယ်။  မင်းတို့ အမှုဖွင့်တာတွေ အရေးယူတာတွေနဲ့ပတ်သက်ရင် ထိထိရောက်ရောက် လုပ်ပါ။ ချက်ချင်းအရေးယူ။  ချက်ချင်း ပိတ်ပစ်လိုက်။ စီးပွားပျက်သွားအောင် လုပ်ပစ်လိုက်။ အဲဒီလို အထိ လုပ်မှ ရမယ်။ ငါတို့ ပြောရမယ်ဆိုရင် ခပ်ရိုင်းရိုင်းပြောရမယ်ဆိုရင် နားရွက်ကို တံတွေးလာစွတ်နေတာ ဒါ လက်ခံလို့မရဘူး။ တို့တွေ လုပ်ဆောင်ချက်ကို ပျက်ပြားသွားအောင် မထီမဲ့မြင်ပြုလုပ်တာ။ ဒါကို ဒီအတိုင်း ကြည့်နေလို့မရဘူး" လို့ စိုးထွဋ်က ပြောခဲ့ပါတယ်။ 

သူရဲ့ ပြောဆိုချက် အသံဖိုင်ကိုလည်း ရန်ကုန်ခေတ်သစ်က ဖော်ပြခဲ့ပြီးဖြစ်ပါတယ်။ 

တကယ်တော့ စိုးထွဋ်ဟာ NLD အစိုးရ၊ NLD သမ္မတလက်အောက်မှာ ပြည်ထဲ ရေးဝန်ကြီး ဖြစ်လာခဲ့ပေမယ့် အဲဒီအချိန်ကတည်းက မင်းအောင်လှိုင် အမိန့်ပဲ သူက နာခံပြီး သမ္မတဦးဝင်းမြင့်ရဲ့ အမိန့်ကို လျစ်လျူရှု မလိုက်နာခဲ့တာတွေ လည်း ရှိခဲ့တယ်လို့ စစ်ဘက်သတင်းရင်းမြစ်က ပြောပါတယ်။ 

လက်ရှိမှာတော့ မင်းအောင်လှိုင်အတွက် စိုးထွဋ်ဟာ အကြမ်းဆုံး အရမ်းဆုံး အရက်စက်ဆုံး သားသတ် သမားအဖြစ် လုပ်ဆောင်ပေးနေသလို အခြားတစ်ဖက်မှာလည်း စိုးထွဋ်၊ မိန်းမနဲ့သားတွေက သူရဲ့ အာဏာနဲ့ပါဝါကို သုံးလို့ မိသားစု စီးပွား ရေး၊ အာဏာပြမှုတွေ၊ အနိုင်ကျင့် ဖိနှိပ်မှုတွေ ၊ အခြားစစ်ဗိုလ်ချုပ်တွေရဲ့ သားတွေကို သတ်ဖို့ ကြိုးစားလာတဲ့အထိ ရဲရဲတင်းတင်းပြုမူမှုတွေ ရှိလာနေပါတယ်။ 

(ဆက်လက်ဖော်ပြပါမည်)