မင်းအောင်လှိုင် ရွေးကောက်ပွဲ ဘယ်တော့လဲ (OPINION)

ဇန်နဝါရီလ တတိယပတ်လောက်မှာ နိုင်ငံရေးမိတ်ဆွေတစ်ဦးက အာဏာသိမ်းကာလ ၂ နှစ်ပြည့်၊ လာမယ့် ဖေဖော်ဝါရီမှာ အကြမ်းဖက်စစ်အုပ်စု ဘယ်လိုဆက်စခန်းသွားမလဲလို့ ကျနော့်အမြင်ကို လှမ်းမေးတယ်။ မိတ်ဆွေရဲ့ သိချင်မှုက ၂၀၀၈ အခြေခံဥပဒေကို ကုလားဖန်ထိုး ရှေ့ဆက်မလား၊ ဘယ်လို ကုလားဖန်ထိုးနိုင်သလဲနဲ့ ဒါမှမဟုတ်  ၂၀၀၈ အခြေခံဥပဒေကို ဖျက်သိမ်းကာ အာဏာသိမ်းလိုက်ကြောင်း ဗြောင်ကြေညာလိုက်မလားဆိုတာကိုပါ။ သတင်းဌာနကြီးတချို့ကလည်း စစ်အုပ်စုဟာ ၂၀၀၈ အခြေခံဥပဒေပေါ်ကနေ ဘယ်လို ရှေ့ ဆက်သွားနိုင်မလဲဆိုပြီး ခြေဥပုဒ်မတွေ တသီကြီး ဆွဲထုတ်ပြကာ ခန့်မှန်းချက်ပေးတာ တွေ့ရသေးတယ်။
ကျနော်ကတော့ စစ်အုပ်စု ဘယ်လိုရှေ့ဆက်မလဲဆိုတာ စိတ်ဝင်စားစရာမရှိတဲ့အတွက် စက္ကူစုတ်ဖြစ် သွားတာကြာပြီဖြစ်တဲ့ ၂၀၀၈ ခြေဥစာအုပ်ကိုလည်း ပြန်မလှန်၊ တစ်ချက်တောင် စေ့စေ့ မတွေးဖြစ်ခဲ့ပါဘူး။ ဘာကြောင့်လဲဆိုတော့ စစ်အုပ်စုက ၂၀၀၈ ခြေဥကို ကိုင်ကာ ဖာပါးစပ်နဲ့ တောင်ရောက်မြောက်ရောက် လျှောက်ပြောနေတာ အာဏာစသိမ်းစကတည်းကမို့ပါ။
စစ်အုပ်စုက ဘာတွေပဲပြောပြော၊ အာဏာသိမ်းလိုက်တယ်ဆိုတာ ပြည်သူတိုင်း အသိ၊ နိုင်ငံတကာလည်း အသိ။ အာဏာသိမ်းထားပြီး အာဏာကို လက်မလွှတ်ချင်တော့တာကြောင့် အကြီးအကျယ်သတ်ဖြတ် ဖျက်ဆီးနေတဲ့ စစ်တပ်ဟာ ဘယ်လိုတွေ ဘာတွေဆက်ပြောပြီး ဘယ်လိုပဲခေါင်းစဉ်တပ်တပ် အာဏာသိမ်းခြင်းဆိုတဲ့ အနှစ်သာရကို ပြောင်းလဲစရာအကြောင်းမရှိဘူးလို့ နားလည်ပါတယ်။
အခုလည်း ဇန်နဝါရီလ ၃၁ ရက်မှာ မင်းအောင်လှိုင်လက်အောက်ခံ အမျိုးသားကာကွယ်ရေးနှင့် လုံခြုံရေးကောင်စီ အစည်းအဝေးခေါ်ပြီး အရေးပေါ်အခြေအနေကို နောက်ထပ် ၆ လ သက်တမ်းထပ်တိုးကြောင်း ကြေညာလိုက်ပါတယ်။
ပြည်သူရွေးကောက်ခံ သမ္မတကို ဖမ်းပြီး အာဏာသိမ်းလိုက်တဲ့ အင်မတန်ရှင်းလင်းလှတဲ့ အာဏာသိမ်းပွဲအပေါ်မြင့်ဆွေကို မင်းအောင်လှိုင်က ယာယီသမ္မတလုပ်ခိုင်း၊ ခြေဥနဲ့ အတင်းကောက်ညီကာ ကုလားဖန်ထိုးခဲ့တဲ့ပွဲအပြီး အခု မြင့်ဆွေကို ကုပ်ချောင်းချောင်းနဲ့ ထပ်တွေ့ရပြန်တယ်။ အခု မင်းအောင်လှိုင်ပြောတဲ့ ကာလုံအစည်းအဝေးဆိုတာ အာဏာသိမ်းထားတာကို ထပ်ကုလားဖန်ထိုးတာဖြစ်လို့ အဲဒီအစည်းအဝေး တက်ရောက်သူအားလုံးဟာ တစ်ချိန်မှာ နိုင်ငံတော်ပုန်ကန်မှုနဲ့ တရားစွဲခံရမယ့် မင်းအောင်လှိုင်ရဲ့အမှုတွဲတွေ ဖြစ်တယ်ဆိုတာ အခုကတည်းက ကြိုတင်ထုံးတို့ထားရပါမယ်။
ဇန်နဝါရီလ ၃၁ ရက်နေ့၊ ကာလုံလို့ ခေါင်းစဉ်တပ်ထားတဲ့ မင်းအောင်လှိုင်ရဲ့ ဆုံးဖြတ်ချက်အရဆိုရင် နောက်ထပ် အရေးပေါ်အခြေအနေသက်တမ်းဆိုတာကို ၆ လ တစ်ဖြတ်နဲ့ ဆက်တိုက်လာမယ့် သဘောပါပဲ။ ဘယ်အချိန်ထိ အရေးပေါ်အခြေအနေ ဖြစ်နေမလဲဆိုတော့ မင်းအောင်လှိုင်လုပ်ချင်နေတဲ့ ရွေးကောက်ပွဲမဖြစ်မချင်းအထိလို့ အကြမ်းဖျင်းပြောနိုင်ပါမယ်။
ဆိုတော့ ရွေးကောက်ပွဲကို စစ်အုပ်စုက ဘယ်တော့လုပ်နိုင်ခြေရှိပါသလဲ။ ဖြစ်နိုင်မယ်ဆိုရင် အခုချက်ချင်းကို စစ်အုပ်စုက ရွေးကောက်ပွဲပြုလုပ်လိုပါတယ်။ ဘာလို့လဲဆိုတော့ ရွေးကောက်ပွဲဆိုတဲ့ ခေါင်းစဉ်ဟာ တိုင်းပြည်အာဏာကို ရာသက်ပန်သိမ်းပိုက်နိုင်မယ့် တရားဝင်နည်းလမ်းလို့ မင်းအောင်လှိုင်ထင်နေလို့ပါပဲ။
စစ်အုပ်စုပြုလုပ်လိုတဲ့ ရွေးကောက်ပွဲဆိုတာ ဒီမိုကရေစီအင်အားစုအားလုံးကို လုံးဝပါဝင်ခွင့် မပေးရုံတင်မက ဇန်နဝါရီနောက်ဆုံးပတ်အတွင်း စစ်အုပ်စုထုတ်တဲ့ နိုင်ငံရေးပါတီဆိုင်ရာ သတ်မှတ်ချက်တွေအရ ရွေးကောက်ပွဲသိပ်ဝင်ချင်နေတဲ့ ကိုကိုကြီးတို့ရဲ့ ပြည်သူ့ပါတီတောင် ပါတီအဖြစ် ဆန်ကာတင်ကျန်ဖို့ မဖြစ်နိုင်ပါဘူး။ 
စစ်အုပ်စုရဲ့ ရွေးကောက်ပွဲလုပ်ချင်စိတ်က တစ်ပိုင်း၊ လတ်တလော သေချာတာက သူတို့ ရည်မှန်းထားသလို လာမယ့် ဩဂုတ်လမှာ ရွေးကောက်ပွဲလုပ်မယ်ဆိုတာကို ရက်အကန့်အသတ်မရှိ ရွှေ့ဆိုင်းလိုက်ပုံရပြီး အဲဒါဟာ စစ်အုပ်စုကို ဆတ်ဆတ်ခါ နာရပါတယ်။
အင်အားကြီး အမေရိကန်က စစ်အုပ်စုရွေးကောက်ပွဲကို အတိအလင်းပယ်ချလိုက်တာကြောင့် အမေရိကန်ရဲ့ မဟာမိတ်နိုင်ငံတွေကလည်း အလိုလို ပယ်ချပြီးသားပါပဲ။ မြန်မာ့အရေးမှာ အရေးပါတဲ့ တရုတ်နိုင်ငံကလည်း စစ်အုပ်စုရွေးကောက်ပွဲကို ပယ်ချကြောင်း တရုတ်ထုံးစံအရ ထုတ်ဖော်ပြောခြင်းမရှိပေမယ့် အသိအမှတ်ပြုပုံမရသလို စစ်အုပ်စုနဲ့ ပလူးချင်နေတဲ့ အိန္ဒိယကလည်း အာဆီယံရဲ့ သတိပေးချက်အရ ရူးချင်ယောင်ဆောင်နေရပါတယ်။ အာဆီယံကလည်း စစ်အုပ်စုရွေးကောက်ပွဲကို ငြင်းကြောင်း ထုတ်မပြောပေမယ့် အာဆီယံမူ ၅ ရပ်ဆိုတာ စစ်အုပ်စုသွားလိုတဲ့ ငါတကောရွေးကောက်ပွဲလမ်းကြောင်းနဲ့ ဖြောင့်ဖြောင့်ကြီး ဆန့်ကျင်နေတာ အသိသာကြီးပါ။ ပြောရရင် စစ်အုပ်စုရွေးကောက်ပွဲအပေါ် ထောက်ခံပါတယ်လို့ ပြောတဲ့ နိုင်ငံတစ်နိုင်ငံတောင် မရှိသေးတာ ကြီးမားတဲ့ ဖိအားတစ်ရပ်ပါပဲ။
ပြီးတော့ ရွေးကောက်ပွဲကိုရော အမှန်တကယ် ဘယ်နှမြို့လောက်မှာ ပြုလုပ်နိုင်မလဲဆိုတဲ့ မေးခွန်းကိုလည်း ဖိအားကြီးကြီးနဲ့ ရင်ဆိုင်နေရပါတယ်။ ဇန်နဝါရီလ ၃၁ ရက်နေ့၊ ကာလုံလို့ နာမည်တပ်ထားတဲ့ အစည်းအဝေးမှာ မင်းအောင်လှိုင်ကိုယ်တိုင် ဝန်ခံလိုက်ရတာက မြန်မာနိုင်ငံတစ်ဝန်း မြို့နယ်ပေါင်း ၃၃၀ မှာ ရာနှုန်းပြည့် ထိန်းချုပ်နိုင်တာ ၁၉၈ မြို့နယ်သာရှိပြီး လုံခြုံရေးနဲ့ ပတ်သက်ပြီး အလေးထားဆောင်ရွက်ရမယ့် မြို့နယ် ၆၅ ခုနဲ့ ထိထိရောက်ရောက် ဆောင်ရွက်ရမယ့်မြို့နယ် ၆၇ ခု ရှိတယ်ဆိုတာပါပဲ။ လုံခြုံရေးအရ အလေးထားဆောင်ရွက်ရမယ့် မြို့နယ်တွေဆိုတာက တစ်စိတ်တစ်ပိုင်းသာ ထိန်းချုပ်နိုင်တဲ့ မြို့တွေလို့ဆိုလိုပြီး လုံခြုံရေးအရ ထိထိရောက်ရောက် ဆောင်ရွက်ရမယ့် မြို့တွေဆိုတာက လုံးဝ ထိန်းချုပ်နိုင်ခြင်းမရှိတဲ့ မြို့တွေလို့ ပြောတာပါ။
သေချာတာက အဲဒီ ၁၃၂ မြို့နယ်မှာ ရွေးကောက်ပွဲပြုလုပ်ဖို့ရာ လောလောဆယ် ဘယ်လိုမှ မဖြစ်နိုင်ပါဘူး။ ဒါ့အပြင် ပြီးခဲ့တဲ့ ဖေဖော်ဝါရီလ ၁ ရက်နေ့ အသံတိတ်သပိတ်ကို မြန်မာမြို့ပေါင်း ၁၅၀ ကျော်က ဆင်နွှဲခဲ့ခြင်းအရ ဒီမိုကရေစီအင်အားစုတွေက စစ်အုပ်စု ရွေးကောက်ပွဲလုပ်မယ့်နေ့မှာ အသံတိတ်သပိတ် ဆင်နွှဲဦးမယ်ဆိုရင် အနည်းဆုံး မြို့ပေါင်း ၁၅၀ ကျော်မှာ ချောက်ချားသွားနိုင်ပါသေးတယ်။ အသံတိတ်သပိတ်ကို အခြေခံပြောရမယ်ဆိုရင် မြန်မာနိုင်ငံက မြို့ပေါင်း ၁၅၀ ကျော်က စစ်အုပ်စုကို အခိုင်အမာ ဆန့်ကျင်နေပါတယ်။
ပြီးတော့ စစ်အုပ်စုရွေးကောက်ပွဲရဲ့ ကနဦးခြေလှမ်းဖြစ်တဲ့ မဲစာရင်းကောက်ယူတဲ့အဆင့်မှာတင် PDF တွေဟာ လက်ပိုက်ကြည့်မနေကြောင်း သက်သေပြခဲ့ပြီးဖြစ်ပါတယ်။ ဒါကိုပဲ ကိုယ်မသေရင်ပြီးရော အသက်တွေ ပေါတယ်ဆိုပြီး နောက်ထပ်ခြေတစ်လှမ်း ထပ်လှမ်းဦးမယ်ဆိုရင် နောက်ထပ် ပြင်းထန်တဲ့ စိန်ခေါ် သံတွေနဲ့ ရင်ဆိုင်ရမှာ မလွဲပါဘူး။ အဲဒီလိုအခြေအနေမျိုးမှာ ဘယ်သူတွေက လွှတ်တော်အမတ် ဝင်အရွေးခံပြီး အသက်ကို ဖက်နဲ့ထုပ်  စင်ပေါ်တက် တရားဟောကာ မဲဆွယ်စည်းရုံးရဲမှာလဲ။ ရန်ကုန်လို၊ မန္တလေးလိုမြို့ ကြီးတွေမှာတောင် ဘယ်အချိန် ဘယ်နေရာက ရောက်လာမယ်မှန်းမသိတဲ့ ကျည်ဆန်တွေက အဆင်သင့် စောင့်နေတာမို့ မင်းအောင်လှိုင်စိတ်ကူးယဉ်နေတဲ့ ရွေးကောက်ပွဲမှာ အမတ်လုပ်ဝင်ရွေးဖို့ ကျပ်ပြည့်တဲ့လူဆို စိတ်ကူးမယဉ်ရဲပါဘူး။
အဲဒီလို ပြည်တွင်း၊ ပြည်ပ ပစ်မှတ်ထားခံနေရတဲ့ ရွေးကောက်ပွဲကို စုံလုံးကန်းဆက်လှမ်းရင် ဆက်ဆိုးရွားနိုင်တာမို့ မင်းအောင်လှိုင်တစ်ယောက် သက်ပြင်းချ တောက်ခတ်ပြီး နောက်တစ်လှမ်း ဆုတ်လိုက်ပုံရပါတယ်။ နောက်တစ်လှမ်းဆုတ်တယ်ဆိုတာ ရှေ့တစ်လှမ်း တိုးဖို့အတွက်ဖြစ်ကြောင်း မမေ့ကြဖို့လိုပါတယ်။ ဘယ်လိုပုံစံမျိုးနဲ့ ရှေ့တစ်လှမ်း ဆက်တိုးလာနိုင်မလဲဆိုတော့ မင်းအောင်လှိုင်ရဲ့ ပုံသေနည်းလမ်းအတိုင်း  တစ်စိတ်တစ်ပိုင်းသာ ထိန်းချုပ်နိုင်တဲ့မြို့နဲ့ လုံးဝထိန်းချုပ်နိုင်ခြင်းမရှိတဲ့ မြို့တွေကို အင်အားသုံးဖြိုခွင်းပြီး ရှေ့ ဆက်လှမ်းမှာ အသေအချာပါပဲ။
စစ်အုပ်စုဟာ သူတို့သွားလိုတဲ့ လမ်းကို နောက်ပြန်မလှည့်စတမ်း၊ ပိုင်းပိုင်းဖြတ်ဖြတ် ရွေးချယ်ထားပြီး ဖြစ်ပါတယ်။ စစ်အုပ်စုသွားနေတဲ့လမ်းကို ပြည်တွင်းအင်အားစုတွေရော နိုင်ငံတကာအသိုင်းအဝိုင်းကပါ ဒီနေ့အချိန်ထိ မဟာဗျူဟာမြောက် မဟန့်တားနိုင်သေးတာလည်း အသေအချာပါပဲ။
~~~~~~
ထွန်းလင်း
#ငွေမောင်းသံ မီဒီယာ