ဟုမ္မလင်းမြို့နယ် ရွှေပြည်အေးမြို့ကို PDFများ စီးနင်းသိမ်းပိုက်ထား

CJ Platform

စစ်ကိုင်းတိုင်း ဟုမ္မလင်းမြို့နယ် ရွှေပြည်အေးမြို့သစ်ကို သိမ်းပိုက်ထားနိုင်ပြီ ဖြစ်ကြောင်း ခန္တီးခရိုင် အမှတ်(၁)တပ်ရင်း -ဟုမ္မလင်းနှင့် HPDF 124တို့မှ ထုတ်ပြန်ထားသည်။

ရွှေပြည်အေးမြို့သစ်မှာရှိသည့် စစ်ကောင်စီနှင့် ပျူစောထီး ပူးပေါင်းတပ်စွဲထားသည့် စခန်းများကို ယမန်နေ့ ဖေဖော်ဝါရီ ၁ရက်နေ့ မနက်ပိုင်းမှစတင်ကာ HPDFနှင့် မဟာမိတ်အဖွဲ့များမှ ထိုးစစ်ဆင် တိုက်ခိုက်ခဲ့တာပဲ ဖြစ်သည်။

အဆိုပါတိုက်ပွဲကို ခန္တီးခရိုင်အမှတ်(၁)တပ်ရင်း-ဟုမ္မလင်း ၊HPDF-124 ၊ HPDF ၊ HPDF- မိုးကြိုး စသည့် မဟာမိတ် တပ်ပေါင်းစုများအဖွဲ့မှ တိုက်ခိုက်ခဲ့တာဖြစ်ပြီး တိုက်ပွဲအတွင်း စစ်ကောင်စီဘက်မှ တိုက်ခိုက်ရေး ရဟတ်ယာဉ်ဖြင့် ၃ ကြိမ် လာရောက်ပစ်ခတ်ခဲ့ပေမယ့် တပ်ပေါင်းစုဘက်မှ လက်ရှိအချိန်အထိ ရွှေပြည်အေးမြို့အား သိမ်းပိုက်ထားနိုင်ဆဲ ဖြစ်ကြောင်း အသိပေးထားသည်။

ယင်းအခြေအနေများနှင့် ပတ်သက်ပြီး HPDF 124တပ်ရင်း တာဝန်ရှိသူထံ ဆက်သွယ် မေးမြန်းရာမှာတော့ တိုက်ပွဲဖြစ်ပွားခြင်းကိုသာ အတည်ပြုပြောကြားထားပြီး စစ်ရေးအခြေအနေများ တင်းမာနေဆဲ ဖြစ်တာကြောင့် အသေးစိတ် ဖြေကြားခြင်း မပြုနိုင်သေးကြောင်းသာ ဖြေကြားထားသည်။

ထို့အပြင် ပြီးခဲ့တဲ့ ဇန်နဝါရီ ‌၂၇ ရက်ကလည်း ရှမ်းနီတပ်မတော်SNA၏ တော်စီ စခန်းကုန်းနှင့် ဂိတ်စခန်းများကို HPDF မဟာမိတ်တပ်ပေါင်းစုမှ တိုက်ခိုက်သိမ်းပိုက်ခဲ့ပြီး လက်နက်များ သိမ်းဆည်းရမိခဲ့သည်။

သိမ်းပိုက်ခံထားရသည့် ရွှေပြည်အေးမြို့သစ်သည် နအဖခေတ် စစ်ကိုင်းတိုင်းတိုင်းမှူး ဗိုလ်ချုပ်ဦးသာအေး တည်ထားခဲ့သည့် မြို့ဖြစ်ပြီး လက်ရှိအချိန်ထိ စစ်ရေးတင်းမာနေသေးတာကြောင့် ဟုမ္မလင်း-ရွှေပြည်အေး၊

ရွှေပြည်အေး-ဖောင်းပြင် ရေလမ်းများကို ပြည်သူများအနေဖြင့် အသုံးပြုသွားလာခြင်း မပြုကြရန်လည်း တပ်ပေါင်းစုဘက်က အသိပေးထားသည်။

 ခေတ်နီ