အလုပ်သမားတွေချုပ်လုပ်နိုင်တာထက်အဆမတန်များတဲ့ အထည်စံချိန်တွေလျှော့ချသတ်မှတ်ပေးဖို့တောင်းဆိုတဲ့ စူပါအလုပ်ထုတ်ခံရ

ဆုလာဘ်ဖြူ

Feb 5, 2023

PEP&CO၊ DUNNES STORES စတဲ့ ပြည်ပအမှတ်တံဆိပ်တွေချုပ်လုပ်တဲ့ လုပ်ငန်းခွင်မှာ အလုပ်သမားတွေချုပ်လုပ်နိုင်တဲ့ စံချိန်က တစ်နာရီကို ပွိုင့် ၁၀၀ နှုန်းဖြစ်ပြီး စက်ရုံဘက်ကတောင်းဆိုတာက တစ်နာရီကို ပွိုင့် ၂၃၀ ပါ။ ဒါကြောင့် အဲ့ဒီလို အဆမတန် တိုးမြှင့်ထားတဲ့စံချိန်ကို ပြည့်မီအောင် ချုပ်လုပ်နိုင်ခြင်းမရှိပါက ည ၉ နာရီအထိ အချိန်ပိုကြေး မရဘဲ ချုပ်လုပ်ပေးရတာပါ။

ဒါ့အပြင် စံချိန်ပြည့်အောင် တနင်္ဂနွေနေ့ကိုပါ အလုပ်ဆင်းပေးရပါတယ်။ အိုတီကြေးမရရှိဘဲ  အခမဲ့ပါ။ ဒါကြောင့် အခက်တွေ့နေရတယ်လို့ GYSEN(MYANMAR) APPAREL CO,LTD စက်ရုံအလုပ်သမားတွေကပြောပါတယ်။

ရန်ကုန်တိုင်း ရွှေပြည်သာ မြို့နယ် ဝါးတရာစက်မှုဇုန် ဝါးတစ်ရာလမ်း မှာဖွင့်လှစ်ထားပြီး အလုပ်သမား ၁၀၀၀ ဝန်းကျင်နဲ့ လုပ်ငန်းလည်ပတ်နေတဲ့ စက်ရုံက တရုတ်နိုင်ငံသားပိုင် လုပ်ငန်းဖြစ်ပြီး လုပ်ငန်းခွင်ထဲမှာ နိုင်ငံခြားသားက တိုက်ရိုက်အုပ်ချုပ်တာတွေလည်းရှိနေတယ်လို့ အလုပ်သမားတွေက‌ပြောဆိုပါတယ်။

အဲ့ဒီအထည်ချုပ်စက်ရုံက ကလေးဝတ် သိုးမွှေး လူကြီးဝတ် သိုးမွှေးအင်္ကျီနဲ့ ဘောင်းဘီတွေချုပ်လုပ်တာလို့သိရပါတယ်။

"စက်လိုင်းတစ်လိုင်းကို ၃၃ ယောက်ပဲပေးတယ် လူထပ်တောင်းလဲမပေးဘူး စံချိန်လျှော့ပေးဖို့ ပြောလဲ မရဘူး တိုင်ချင်ရာတိုင်လို့ပဲပြောတယ် သူတို့တောင်းတဲ့စံချိန်မပြည့်ရင် ဝမ်တိန် ထိုးပြီး အလုပ်ထွက်လို့ပြောတယ်" လို့ အမည်မဖော်လိုတဲ့ အလုပ်သမားကပြောပါတယ်။

လုပ်ငန်းခွင်ထဲမှာ တောင်းသလောက်စံချိန်ရဖို့ အလုပ်တက်ချိန် နံနက် ၈ နာရီ ၃၀ မတိုင်ခင် စတင် ချုပ်လုပ်ပေးရကာ နေ့လည် ထမင်းစားချိန် မိနစ် ၃၀ မှာ ထမင်းအမြန်စားပြီးချုပ်လုပ်ရတာနဲ့ ညဘက် ၉ နာရီ အထိ ပျမ်းမျှ တစ်နေ့လျှင် ၁၃ နာရီချုပ်လုပ်ပေးရပြီး ရရှိတဲ့ ငွေကြေးကတော့ ၄၈၀၀ ကျပ်ပါ။တနင်္ဂနွေနေ့မှာလည်း အနားမယူရဘဲ အိုတီအခမဲ့ ဆင်းပေးရပါသေးတယ်လို့ အလုပ်သမားတွေက ပြောဆိုပါတယ်။

အဲ့ဒီလို စံချိန်တိုးတောင်းတာနဲ့ ပတ်သက်ပြီး စက်လိုင်း ၁၂ ကြီးကြပ်သူ စူပါမှ ဦးဆောင်ကာ စံချိန်လျှော့ပေးဖို့ တောင်းဆိုခဲ့ရာမှ စက်လိုင်း ၁၂ ကို ဖျက်သိမ်းကာ လိုင်းပြောင်းခိုင်းစေခဲ့ပြီး တောင်းဆိုပေးတဲ့ စူပါကတော့ ဇန်နဝါရီ ၃၁ ရက်နေ့မှာပဲ အလုပ်ထုတ်ခံခဲ့ရတယ်လို့ သိရပါတယ်။

ထပ်မံကြုံတွေ့နေရတဲ့အခက်အခဲတွေကတော့ စူပါ အောစူပါတွေက ရိုင်းစိုင်းစွာ ပြောဆိုတာ အလုပ်သမားတွေအနေနဲ့ ခွင့်ခံစားခွင့်တွေကို တန်းတူညီမျှခံစားခွင့်မရတာ သောက်သုံးရေ မသန့်ရှင်းတာတွေလည်းသောက်သုံးနေရတယ်လို့ အခက်တွေ့နေတဲ့ အလုပ်သမားတွေကပြောပါတယ်။

လုပ်ငန်းခွင်ထဲမှာ အလုပ်သမားသမဂ္ဂအဖွဲ့ရှိပေမယ့် လက်ရှိကြုံတွေ့နေရတဲ့ အခက်အခဲတွေ ဖြေရှင်းနိုင်ခြင်းမရှိသလို  ချိုးဖောက်ခံရမှုတွေလည်း ကြုံတွေ့နေရတယ်လို့ အလုပ်သမားတွေထံကသိရပါတယ်။

အဆိုပါ လုပ်ငန်းခွင်ထဲက အလုပ်သမားတွေအနေနဲ့ ချုပ်လုပ်နိုင်တဲ့ စံချိန်ကိုသာ သတ်မှတ်တောင်းခံပေးဖို့ အိုတီကြေးပေးချေဖို့ တနင်္ဂနွေနေ့မှာ အလုပ်သမားသဘောဆန္ဒမပါဘဲ ခိုင်းစေတာတွေ မပြုလုပ်ဖို့တောင်းဆိုလိုတယ်လို့ သိရပါတယ်။

#MyanmarLabourNews