ပုသိမ်အကျဉ်းထောင် အဓိကရုဏ်းနှိမ်နင်းမှုအပေါ် လှုပ်ရှားသူတွေတုံ့ပြန်

VOA

ဧရာဝတီတိုင်း၊ ပုသိမ်အကျဉ်းထောင်က နိုင်ငံရေးသမားတချို့ နှိပ်စက်၊ ညှင်းပန်းခံရပြီးနောက် သေဆုံး၊ ဒဏ်ရာရခဲ့တဲ့ကိစ္စကို ကုလအပါအဝင် နိုင်ငံတကာ အဖွဲ့အစည်းတွေဆီ ပေးပို့သွားမယ်လို့ NUG ရဲ့ လူ့အခွင့်အရေးဆိုင်ရာဝန်ကြီးဌာနက ထုတ်ပြန်ထားပါတယ်။ ဒီဖြစ်ရပ်ကို စုံစမ်းလေ့လာခဲ့သူတချို့ကတော့  ဒါဟာ နိုင်ငံရေးအကျဉ်းသားတွေအပေါ် ရည်ရွယ်ချက်ရှိရှိကျူးလွန်ခဲ့တဲ့ စစ်ကောင်စီရဲ့အကြမ်းဖက်မှု ဖြစ်တယ်လို့ ပြောပါတယ်။ ဒီအကြောင်း ပေးပို့ချက်ကို မသိင်္ဂီထိုက်က တင်ပြပေးထားပါတယ်။

ပုသိမ်အကျဉ်းထောင် အကြမ်းဖက်မှုဖြစ်စဉ်ကို နိုင်ငံတကာအဆင့် အဖွဲ့ အစည်းတွေဆီပေးပို့သွားမယ်လို့ အမျိုးသား ညီညွတ်ရေးအစိုးရ၊ လူ့အခွင့်အရေးဆိုင်ရာဝန်ကြီးဌာနက ထုတ်ပြန်ထားပါတယ်။ ဇန်နဝါရီလ ၅ ရက်နဲ့ ၆ ရက်မှာဖြစ်ပွားခဲ့တဲ့ ဒီအကြမ်းဖက်မှုဖြစ်စဉ်မှာ အကျဉ်းသားတယောက် သေဆုံးပြီး နောက်ထပ်၇၀ လောက် ဒဏ်ရာရခဲ့ကြပါတယ်။

မြန်အောင်မြို့က နိုင်ငံရေးအကျဉ်းသား ကျောင်းဆရာတဦးကို သေဒဏ်စီရင်ဖို့ ထောင်အာဏာပိုင်တွေပြင်ဆင်နေတာကို အကျဉ်းသား ၈ ယောက်က ကန့်ကွက်ခဲ့တဲ့အတွက် ရိုက်နှက်၊ တိုက်ပိတ်တာကနေ ဒီပြဿနာ စတင်ခဲ့တာပါ။ အကျဉ်းသား ၇ ယောက်ကို တိုက်ပိတ်ခဲ့ပေမဲ့ အကျဉ်းသား ဝင်းမင်းထက်ကတော့ ပျောက်ဆုံးနေခဲ့ပါတယ်။ 

နိုင်ငံရေးအကျဉ်းသား ဝင်းမင်းထက်ကိုပြန်ပေးဖို့ အကျဉ်းသား ၇၀ လောက်ကတောင်းဆိုတဲ့အခါမှာတော့ ထောင်ဝန်ထမ်းတွေက စတင်ရိုက်နှက်ခဲ့ပါတယ်။ အဲဒီနောက် ရဲဝတ်စုံဝတ်ဆင်ထားတဲ့ လူ ၃၀ လောက်က ကိုးလုံးရာဘာကျည်နဲ့ ပစ်ခတ်ခဲ့တဲ့အတွက် အကျဉ်းသား ၇၀ လောက် ဒဏ်ရာရခဲ့တာပါ။ အဲဒီနောက် အခန်းတွေထဲကဆွဲထုတ်ခံရပြီး ထပ်မံ ရိုက်နှက်ခံခဲ့ရတယ်လို့ NUG က ထုတ်ပြန်ထားပါတယ်။

အဲဒီအထဲက PDF လို့စွပ်စွဲခံထားရတဲ့ကိုဝေယံဖြိုးကို နေ့လယ်ပိုင်းမှာ သေနတ်နဲ့ ပစ်သတ်ခဲ့ကြတယ်လို့ သတင်းတွေက ရေးသားဖော်ပြကြပါတယ်။ ကိုဝေယံဖြိုးဟာ ဦးခေါင်းမှာ သေနတ်ဒဏ်ရာသုံးချက်နဲ့သေဆုံးခဲ့တယ်လို့ NUG ဘက်ကလည်း ထုတ်ပြန်ထားတာပါ။

ဒီကိစ္စကို စုံစမ်းရေးသားခဲ့တဲ့ Ayeyarwaddy Times သတင်းဌာနရဲ့ အယ်ဒီတာချုပ် ဆလိုင်းသန့်စင်ကတော့ ဒါဟာ ထောင်အာဏာပိုင်တွေဘက်က လူသေစေတဲ့အထိကျူးလွန်ခဲ့တဲ့ ထောင်တွင်းအကြမ်းဖက်မှုဖြစ်ကြောင်း ဗွီအိုအေကို ပြောပါတယ်။ ထောင်ဆူပူမှုမှာပါတယ်လို့ သူတို့ယူဆတဲ့ နိုင်ငံရေး အကျဉ်းသားတွေကို တယောက်ပြီးတယောက် ရွေးထုတ်ပြီး ရိုက်နှက်ခဲ့ကြတာဖြစ်ကြောင်း သူကပြောပါတယ်။

"ကျနော်တို့သိတဲ့အရ ဆိုရင် ကိုဝေယံဖြိုး (ခေါ်) ကိုရာစုက သေနတ်နဲ့ပစ်ခံရလို့ သေတယ်လို့လည်း ကြားတယ်။ ရိုက်လို့ သေတယ်လို့လည်း ကြားရတယ်။ ဘယ်ဟာလဲလို့ တိတိကျကျ ကျနော်တို့ အတည်ပြုလို့ မရဘူး။ သိတဲ့သူတွေကတော့ သေနတ်ဒဏ်ရာ တွေ့တယ်လို့လည်း ပြောကြတယ်ပေါ့နော်။ ဒါပေမဲ့ သူ့ရဲ့အလောင်းကို မိသားစုဆီ ပြန်ပေးတာလည်း မရှိဘူး။ စစ်ကောင်စီက သူတို့သဘောနဲ့ သူတို့ သဂြိုဟ်ပစ်တာပေါ့လေ။ အဲဒီတော့ ကိုဝေယံဖြိုး မိသားစုက သူတို့ရဲ့ခင်ပွန်းဖြစ်တဲ့သူ၊ သားဖြစ်တဲ့သူသာ သေသွားတယ်။ ဘာကြောင့်သေတယ်ဆိုတာ တိတိကျကျ သိရတဲ့အနေအထားမျိုး မရှိဘူး။ အားလုံးကို ပြန်သုံးသပ်ကြည့်တဲ့အခါမှာ မတရား ဖိနှိပ်၊ အကြမ်းဖက်၊ ရက်စက်တဲ့အခါမှာ နိုင်ငံရေးအကျဉ်းသားတယောက် သေတဲ့အထိဖြစ်သွားတယ်လို့ ကျနော်တို့ သုံးသပ်ပါတယ်။ ဒီဖြစ်စဉ်သည် ပုသိမ်ထောင် အာဏာပိုင်တွေက နိုင်ငံရေးအကျဉ်းသားတွေအပေါ်မှာ ရည်ရွယ်ချက်ရှိရှိ လူသေစေတဲ့အထိ ရိုက်နှက်ကျူးလွန်ခဲ့တဲ့ ထောင်တွင်းအကြမ်းဖက်မှု၊ လူသတ်မှုဖြစ်စဉ်လို့ပဲ ပြောချင်ပါတယ်။"

သေဆုံးသွားတဲ့ နိုင်ငံရေးအကျဉ်းသား ကိုဝေယံဖြိုးကို မနေ့က ဇန်နဝါရီ ၇ ရက်မှာ ပုသိမ်မြို့ မီးသဂြိုဟ်စက်မှာ လုံခြုံရေးအပြည့်နဲ့ သဂြိုဟ်ခဲ့ပါတယ်။ မိဘနှစ်ပါးကိုတော့ မီးမသဂြိုဟ်ခင် မြင်ခွင့်ပေးခဲ့ကြောင်း နီးစပ်သူတဦးက ဗွီအိုအေကို ပြောပါတယ်။ သေနတ်ဒဏ်ရာကြောင့်လား၊ ရိုက်နှက်ခံရတာလား အတိအကျ မပြောနိုင်ပေမဲ့ ဦးခေါင်းကြေမွတဲ့ဒဏ်ရာကြောင့် သေဆုံးခဲ့ကြောင်း နီးစပ်သူက အခုလိုပြောပါတယ်။

" နားအထက်ကနေ လက်သန်းလုံးလောက် အရေပြားကို သူတို့ကယူပြီးတော့ အနောက်နား နားနှစ်ဖက်ဆီ ခေါင်းအကုန်လုံးကို ခွဲထားတဲ့ပုံစံမျိုး ပြန်ချုပ်ထားတယ်။ အကြီးကြီးပဲ လုပ်ထားတယ်ဆိုတော့။ သူတို့ကပြောတယ်။ ဒါသေနတ်ဒဏ်ရာ မဟုတ်ဘူးဆိုပြီး ပြောတယ်။ အန်တီတို့က တအားကြီးလည်း မစစ်ကြောနိုင်ဘူး။ ငါးမိနစ်လောက်ပဲ အချိန်ရတယ်။ သူတို့က အမိန့်ပြန်ပေးတယ်။ သူတို့ကား ဆယ်စီးလောက်လာပြီးတော့ သဂြိုဟ်ပေးတယ်။ သူတို့ပြန်တော့မှ သရဏဂုံလည်းတင်တယ်၊ အကုန်လုံးပေါ့နော် အဲလို။"

ဧရာဝတီတိုင်း အကျဉ်းဦးစီးဌာနကို ဗွီအိုအေက မေးမြန်းခဲ့ပေမဲ့ ဖြေဆိုဖို့ ငြင်းခဲ့ပါတယ်။ စစ်ကောင်စီရဲ့ ဧရာဝတီတိုင်း နယ်စပ်ရေးရာဝန်ကြီးနဲ့ အကျဉ်းဦးစီး ဌာနက ဦးဇော်စစ်အောင်တို့လည်း ပဋိပက္ခဖြစ်တဲ့အချိန်မှာ ရှိနေခဲ့ကြတယ်လို့ နီးစပ်သူတချို့က ပြောပါတယ်။ စစ်ကောင်စီကတော့ ကီးပတ်ဖုန်းသုံးနေတဲ့ အကျဉ်းသားတဦးကို အရေးယူဖို့လုပ်နေချိန်မှာ ရုန်းရင်းဆန်ခတ်ဖြစ်အောင် အကျဉ်းသားတွေဘက်က စတင်ခဲ့တာလို့ သတင်းထုတ်ပြန်ခဲ့တာပါ။ ဒါနဲ့ ပတ်သက်ပြီးတော့လည်း ထောင်ပြင်ပမှာရှိတဲ့ ဆက်စပ်သူတွေကိုလည်း ဖမ်းဆီးတာတွေလည်း ဆက်ရှိနေပါတယ်။

#PDF #ပုသိမ်အကျဉ်းထောင် #အဓိကရုဏ်း #ဝေယံဖြိုး #ကိုရာစု #ဝင်းမင်းထက် #နိုင်ငံရေးအကျဉ်းသား