မြန်မာနိုင်ငံကို စစ်လက်နက်ရောင်းချခြင်းမရှိကြောင်း စင်္ကာပူနိုင်ငံခြားရေးဝန်ကြီးပြော

VOA
စင်္ကာပူနိုင်ငံအနေနဲ့ မြန်မာနိုင်ငံကို စစ်လက်နက်တွေ ရောင်းချခြင်းမပြုတာ နှစ်ပေါင်းအတန်ကြာခဲ့ပြီဖြစ်ပြီး အဲဒီ်ရဲ့ အကျိုးသက်ရောက်မှုတွေလည်း ရှိနေတယ်လို့ စင်္ကာပူနိုင်ငံခြားရေးဝန်ကြီး Vivian Balakrishnan က ဒီကနေ့မှာ ပြောပါတယ်။

ဇန်နဝါရီလ ၁၆ ရက်နေ့ထုတ် SAC-M မြန်မာနိုင်ငံဆိုင်ရာ အထူးအကြံပေးကောင်စီရဲ့ အစီရင်ခံစာမှာ မြန်မာနိုင်ငံတွင်း လူ့အခွင့်အရေး ချိုးဖောက်မှုတွေမှာအသုံးပြုတဲ့ စစ်ကောင်စီရဲ့ စစ်လက်နက်ပစ္စည်းတွေ ထုတ်လုပ်ရာမှာ စင်္ကာပူအပါအဝင် နိုင်ငံပေါင်း ၁၃ နိုင်ငံထက်မနည်းက စီးပွားရေးကုမ္ပဏီတွေ ပါဝင်ပတ်သက်နေကြတယ်လို့ ထည့်သွင်း ဖော်ပြခဲ့တာနဲ့ ပတ်သက်လို့ စင်္ကာပူ လွှတ်တော်အမတ် Dennis Tap က လွှတ်တော်အမေးအဖြေကဏ္ဍမှာ မေးခဲ့တာကို ဝန်ကြီး Balakrishnan ပြန်လည် ဖြေကြားခဲ့တာပါ။
မြန်မာနိုင်ငံကို လက်နက်တွေ တင်ပို့မှုမှာ SAC-M ရဲ့ အစီရင်ခံစာမှာ ဖော်ပြထားတဲ့ စင်္ကာပူကုမ္ပဏီတွေ ပါဝင်ပတ်သက်နေခြင်းရှိမရှိ အာဏာပိုင်တွေက အသေအချာ စစ်ဆေးခဲ့ခြင်းရှိမရှိ လွှတ်တော်အမတ် Dennis Tap က မေးခွန်းထုတ်ခဲ့ပါတယ်။
မြန်မာစစ်တပ်အတွက် စစ်လက်နက်၊ ဒါမှမဟုတ် စစ်ဘက်ဆိုင်ရာအတွက် အသုံးပြုနိုင်မယ့်အရာတွေကို လွှဲပြောင်းပေးအပ်တာမျိုး စင်္ကာပူနိုင်ငံက ခွင့်ပြုတာမရှိကြောင်း SAC-M ရဲ့ အစီရင်ခံစာထွက်ပြီး ရက်ပိုင်းအတွင်းမှာဘဲ ဝန်ကြီး Balakrishnan က ပြန်လည် ဖြေကြားခဲ့ပြီးလည်း ဖြစ်ပါတယ်။ စင်္ကာပူက မြန်မာနိုင်ငံနဲ့ စီးပွားရေးအရ ပတ်သက်ဆက်နွယ်မှုတွေဟာ မြန်မာနိုင်ငံမှာ စစ်တပ်က အာဏာသိမ်းယူခဲ့တဲ့ ၂၀၂၁ ခုနှစ် မတိုင်ခင်ကတည်းကလို့ ဆိုပါတယ်။