တောင်ကုတ်ရဲစခန်းမှ ရဲအုပ် ဝင်းခိုင်ကို စစ်တပ်က ဖမ်းဆီး
ဧရာဝတီ၊ ဖေဖော်ဝါရီ ၁၄၊ ၂၀၂၃
ရခိုင်ပြည်နယ်၊ တောင်ကုတ်မြို့နယ်ရဲတပ်ဖွဲ့မှ ရဲအုပ် ဝင်းခိုင်ကို ယနေ့ နံနက် ၈ နာရီ အချိန်ခန့်တွင် အာဏာသိမ်း စစ်ကောင်စီတပ်က လာရောက် ဖမ်းဆီးသွားကြောင်း သိရသည်။
အဆိုပါ ရဲအုပ် ဝင်းခိုင်သည် တောင်ကုတ်-ရန်ကုန်ကားလမ်းမပေါ်ရှိ တောင်ပေါ်ကြီး စစ်ရေးဂိတ်တွင် စခန်းမှူး တာဝန်ဖြင့် တာဝန်ကျနေသူတဦး ဖြစ်ပြီး တောင်ကုတ်မြို့မရဲစခန်းသို့ အမှုကိစ္စဖြင့် လာရောက်စဉ် စကခ (၅) တပ်မဌာနချုပ်မှ စစ်ကောင်စီ တပ်သားများက လာရောက် ဖမ်းဆီးသွားခြင်း ဖြစ်ကြောင်း ရဲတပ်ဖွဲ့နှင့် နီးစပ်သူတဦးက ပြောသည်။
၎င်းက “တောင်ကုတ်မြို့မစခန်းကို လာပြီးတော့ ရဲအုပ် ဝင်းခိုင်ကို တပ်က ဗျူဟာမှူးကိုယ်တိုင် ကားနဲ့လာပြီးတော့ ဖမ်းသွားတယ်လို့ ပြောတယ်။ ဘာကိစ္စနဲ့ ဖမ်းတယ် ဆိုတာတော့ မသိဘူး။ ရဲတွေ ပြောတာက ရဲအရာရှိ တယောက်ကို အဲဒီလိုမျိုး တပ်က အကြောင်းပြချက် မရှိဘဲ ဖမ်းလို့ရသလားဆိုပြီး မကျေမနပ် ဖြစ်နေကြတယ်” ဟု ဧရာဝတီကို ပြောသည်။
ရဲအုပ် ဝင်းခိုင် တာဝန်ကျနေသည့် တောင်ကုတ်-ရန်ကုန်ကားလမ်းမပေါ်ရှိ တောင်ပေါ်ကြီး စစ်ဆေးရေးဂိတ်တွင် ပြီးခဲ့သည့် ဇန်နဝါရီလအတွင်းက သစ်မှောင်ခို ကား ၃ စီးအား ဖမ်းဆီးခဲ့သည့် ဖြစ်စဉ်များရှိကာ ယင်း ကိစ္စများနှင့် ပတ်သက်ပြီး တပ်က တစုံတရာ ဆက်နွယ်မှု ရှိနိုင်သဖြင့် ထိုသို့ ဖမ်းဆီးခံရခြင်း ဖြစ်နိုင်ကြောင်း ရဲတပ်ဖွဲ့အသိုင်းအဝိုင်းကြား ပြောဆိုမှုများလည်း ရှိသည်။
လက်ရှိ အခြေအနေတွင် အဆိုပါ ရဲအုပ် ဝင်းခိုင်အား တောင်ကုတ်အခြေစိုက် အမှတ် (၅) စစ်ဆင်ရေးကွပ်ကွဲမှုဌာနချုပ် (စကခ-၅) တပ်မအချုပ်ခန်းထဲတွင် ဖမ်းဆီးချုပ်နှောင်ထားကြောင်း သိရသည်။
#WhatsHappeningInMyanmar
#RejectMilitaryCoup
Comments