ချစ်သူများနေ့တွင် လေထီးခုန်လေ့ကျင့်ခဲ့သည့် မှော်ဘီလေထီးတပ်စခန်းမှ အမျိုးသမီးစစ်သည်များ လေ့ကျင့်စဉ် လူနေအိမ်ပေါ်ပြုတ်ကျ
ဧရာ၀တီတိုင်းမ်
ဖေဖော်ဝါရီလ ၁၄ ရက်
ရန်ကုန်တိုင်း၊ မှော်ဘီမြို့နယ်ရှိ လေတပ်စခန်းတွင် စစ်ကောင်စီ၏ အမျိုးသမီး စစ်သည်များ လေထီးခုန်လေ့ကျင့်ရာတွင် လူနေအိမ်များပေါ်သို့ ပြုတ်ကျမှု ဖြစ်ပွား ခဲ့ကြောင်း အဆိုပါမြို့နယ်တွင် နေထိုင်သူများ၏ ပြောပြချက်အရ သိရှိရသည်။
ယနေ့ ဖေဖော်၀ါရီ ၁၄ ရက် နံနက်ပိုင်းက မှော်ဘီရှိ ပူးပေါင်းစစ်ဆင်ရေးနှင့် လေထီး သင်တန်းကျောင်းမှ အမျိုးသမီးစစ်သည်များ လေထီးခုန်လေ့ကျင့်မှု ပြုလုပ်နေစဉ် စစ်သည်အချို့သည် ၎င်းတို့၏လေထီးနှင့်အတူ ရပ်ကွက်နေ ပြည်သူများ၏ အိမ်ပေါ်သို့ ပြုတ်ကျမှု ဖြစ်ပွားခဲ့သည်။
"မနက်က စစ်ကောင်စီတပ်က စစ်မေ တွေလေ့ကျင့်နေတာ။ လေထီးခုန်လေ့ကျင့်နေရင်း အိမ်ပေါ်ကို ပြုတ်ကျတာ။ သေသလား၊ ရှင်သလားတော့မသိဘူး။ လူနာတင်ယာဉ်နဲ့ ခေါ်သွားတာပဲ"ဟု ပြုတ်ကျမှုဖြစ်ပွားခဲ့သည့် ရပ်ကွက်အနီးနေထိုင်သူ အမျိုးသား တစ်ဦးက ဧရာ၀တီတိုင်းမ်ကိုပြောသည်။
မှော်ဘီ လေထီးတပ်မှ လေ့ကျင့်စဉ်ပြုတ်ကျခဲ့သည့် အမျိုးသမီးစစ်သည်၏ အခြေအနေ အသေးစိတ်ကို အတည်ပြု၍မရသေးဘဲ ပြုတ်ကျမှုဖြစ်စဉ်မှာ အမှန်တကယ်ဖြစ်ပွား ခဲ့ကြောင်း တပ်တွင်းနှင့်နီးစပ်သူတစ်ဦးက အတည်ပြု ပြောကြားသည်။
ဓာတ်ပုံ-ပုံဟောင်းပြန်လည်အသုံးပြုထားသည်။
#ရန်ကုန်မြို့ #မှော်ဘီလေထီးတပ်စခန်း #အမျိုးသမီးစစ်သည် #လေထီးခုန်လေ့ကျင့် #ပြုတ်ကျ #Ayeyarwaddy_Times
Comments