( လှစိုးဝေ) NUG နိုင်ငံခြားရေး ဝန်ကြီးဌာနအား ဝါရှင်တန် တွင် ဖွင့်ပြီ

ဖွင့်ပွဲ အခမ်းအနားသို့ အမျိုးသား ညီညွတ်ရေး အစိုးရ အဖွဲ့မှ နိုင်ငံခြားရေး ဝန်ကြီး ဒေါ်ဇင်မာအောင်၊ ဒု တိယ နိုင်ငံခြားရေး ဝန်ကြီး ဦးမိုးဇော်ဦး၊ အမေရိကန် နိုင်ငံခြားရေး ဝန်ကြီးဌာနမှ တာဝန်ရှိသူ များ တက်ရောက်ခဲ့ကြသည်ဟု RFA သတင်းတွင် ဖေါ်ပြထားသည်။
ယင်းသည် ကွန်ဂရက် မှ မြန်မာပြည်သူများ၏ ဒီမိုကရေစီ အရေး ကို အားပေး ထောက်ခံရန် အတည်ပြုလိုက်သော Burma Act ၏ တစိတ်တပိုင်းလည်း ဖြစ်သည်ဟု ဝန်ကြီး ဒေါ်ဇင်မာအောင်က ပြောကြားခဲ့သည်။ အမေရိကန် အစိုးရ ပိုင်းမှ တာဝန်ရှိသူ များ တက်ရောက်လာခြင်းသည် မိမိတို့ အစိုးရနှင့် တရားဝင် ဆက်သွယ်လာပြီ ဆိုသည်ကို ပြဆိုလိုက်ခြင်းပင် ဖြစ်သည်ဟု ဆိုသည်။
အမေရိကန် လူ့အခွင့်အရေး၊ ဒီမိုကရေစီ အရေး ဆိုင်ရာ လက်ထောက် နိုင်ငံခြားရေး ဝန်ကြီး အူဇရ ဇေရာ မှ Burma Act တွင် ပါဝင်သည့် အတိုင်း ဆက်လက် ဆောင်ရွက်သွားမည် ဖြစ်ကြောင်း နှင့် ‌၎င်းတို့ ပြုလုပ်မည့် အတုအယောင် ရွေးကောက်ပွဲ အားလည်း ဒေသတွင်း ရှိ နိုင်ငံများမှ အသိအမှတ် မပြုဖို့ လိုသည်ဟုလည်း ပြောကြားသွားခဲ့သည်။
#စစ်အာဏာသိမ်း အဖွဲ့ကို ဆက်ဆံစရာ မလိုတော့သည့် အချိန်ရောက်ပြီ
အဆိုပါ ခေါင်းစဉ် ဖြင့် The Diplomat အွန်လိုင်း မဂ္ဂဇင်းတွင် ဆောင်းပါးရှင် ဂျော်ဒန် အဲရစ်ဆန် က ရေးသားထားသည်။
ဆောင်းပါး အစတွင် အင်းမလှုပ် အဲမလှုပ် နှင့် စွန့်စားလိုစိတ် ကင်းမဲ့နေသော အိမ်နီးချင်း နိုင်ငံများအားလည်း ယခုလို ရဲရဲတောက် မေးခွန်း မေးလာပြန်သည်။
“မြန်မာ အကျပ်အတည်းကို နိုင်ငံရေး အရ အဖြေရှာရန် ကြိုးစားနေသူများ အနေဖြင့် စစ်အာဏာသိမ်း အဖွဲ့ သည် ၎င်းတို့ ကျုးလွန်ခဲ့သော ရာဇဝတ်မှုများ အတွက် တာဝန်ယူမည်လော” 
အဖြေကတော့ ရှင်းပါသည်၊ ၎င်းတို့မှ မည်သို့မျှ တာဝန်ခံကြမည် မဟုတ်ဟု ဆိုသည်။
မြန်မာ ပြည်သူများ လက်နက်ကိုင် တော်လှန်လာအောင် လည်း တွန်းပို့ခဲ့ကြသူများသည် စစ်တပ်ပင် ဖြစ်သည်။ ယင်းနှင့် အတူ စစ်တပ် ထဲတွင်လည်း စိတ်ဓါတ်ကျင့်ဝတ်များ ပျက်ပြားလာခဲ့ခြင်း၊ အမိန့်မနာခံခြင်း၊ အုပ်ချုပ်မှု လျော့ရဲလာခြင်း၊ အကျင့်ပျက် လဒ်စားခြင်း အစရှိသည် တို့ကြောင့် တိုက်ပွဲတိုင်းတွင် အရှက်တကွဲ ရှုံးနိမ့်ကုန်ကြပြီး အားလုံး၏ လှောင်ပြောင်စရာ အဖြစ် ရောက်ကုန်ကြပြီ ဖြစ်သည်။
သံအမတ်ကြီး ဦးကျော်မိုးထွန်း သည် အမျိုးသား ညီညွတ်ရေး အစိုးရ ကိုယ်စားလှယ် အဖြစ် ကုလသမဂ္ဂ တွင် ဆက်ရှိနေသရွေ့ မည်သို့သော နည်းဖြင့် ပြုလုပ်သည့် ရွေးကောက်ပွဲ ဖြစ်စေ တက်လာသော အစိုးရမျိုးကို မဆို နိုင်ငံတကာ၏ အသိအမှတ် ပြု ခံရမည် မဟုတ် ဆိုသည်က ထင်ရှားနေသည်။
လက်ရှိ အနေအထား တွင် အာဏာသိမ်းပြီး နောက် အာဏာကို အခိုင်အခံ တည်ဆောက် နိုင်အောင် ကြိုးပမ်းသည့် အဖြစ်မှ နှစ်နှစ် ကြာလာပြီး နောက်တွင် ဆက်၍ ရပ်တည်နိုင် ခွင့် ရရေး အတွက် မနည်း လုံးပမ်းနေကြရသည့် အနေအထားသို့ ဆိုက်ရောက်လာခဲ့ပြီ ဖြစ်သည်။
ထို့အတွက် အိမ်နီးချင်း နိုင်ငံများ အနေဖြင့် စစ်အာဏာသိမ်း အဖွဲ့ မရှိတော့သည့် နောက်ပိုင်း မြန်မာ ပြည်ရှိ ၎င်းတို့ အကျိုးစီးပွားကို အကာအကွယ် ရရန် လုပ်ရတော့မည့် အချိန်‌ ရောက်လာပြီ ဖြစ်သည်။ စစ်အာဏာသိမ်း အဖွဲ့ နောက်ပိုင်း တက်လာမည့် အစိုးရသည် လူထု၏ ဆန္ဒ နှင့် အညီ မဖြစ်မနေ အကောင်အထည် ဖေါ်ပေးရဖို့ ရှိနေသည်ကို သဘောပေါက်ဖို့ လိုနေပေသည်။ လူထုကလည်း တော်လှန်ရေး ကာလ အတွင်း မိမိတို့ကို အကူအညီ ပေးသည့် နိုင်ငံများ ဖက်ကို ယိမ်းကြမည်သာ ဖြစ်သည်။
တော်လှန်ရေး အစိုးရသည်လည်း ကုန်ခမ်းနေပြီ ဖြစ်သော နိုင်ငံခြား အရံငွေများ အလျှင်အမြန် ဖြည့်တင်းနိုင်ရန် မိမိတို့ကို အကူအညီပေးခဲ့သော တိုင်းပြည်များအား အကျိုးအမြတ် ရှိမည့် နယ်ပယ်များ တွင် ရင်းနှီးမြုပ်နှံနိုင်ရန် လုပ်ငန်းများ ချပေးတော့မည်သာ ဖြစ်သည်။
တရုတ်
တရုတ် အနေဖြင့် လောလောဆယ် ခြံစည်းရိုး ခွထိုင်နေမှု ကို အဆုံးသတ်ပေးရမည်၊ မြန်မာ လူထုက လက်ရှိ တွင် တရုတ်သည် မဟာမိတ် ဖြစ်သော ရုရှားအား  စစ်အာဏာသိမ်း အဖွဲ့ နှင့် တဖက်လှည့် ဆက်ဆံခိုင်း နေသည်ဟု ယူဆနေမှုများ ပပျောက်သွားရန် ရုရှားမှ လက်နက်ရောင်းချနေမှု များ အပါအဝင် အန္တရာယ်လွန်စွာ များသော ဆက်ဆံရေး ရပ်ဆိုင်းသွားအောင် အရင်ဦးဆုံး ပြုလုပ်ရမည်၊ 
ပြီးလျှင် မြန်မာတော်လှန်ရေး တပ်ဖွဲ့များ အပူတပြင်း လိုအပ်နေသော လေယာဉ်ပစ် လက်နက်များ ထောက်ပံ့ပေးမည် ဆိုလျှင် မြန်မာပြည်တွင် ဆက်၍ စီးပွားလုပ်ပိုင်ခွင့် များ အတွက် Golden Ticket အထူးတန်း လက်မှတ် ရရှိဖို့က ကြိမ်းသေသွားပြီ ဖြစ်သည်။
အိန္ဒိယ
အိန္ဒိယ သည် လက်ရှိတွင် ၎င်းတို့ ၏ အရှေ့မြောက် ဒေသ လုံခြုံရေး အတွက် စစ်အာဏာသိမ်း အဖွဲ့နှင့် မဖြစ်မနေ ဆက်ဆံနေရသည်ဟု အကြောင်းပြလာခဲ့သည်။ သို့သော် စစ်အာဏာသိမ်း အဖွဲ့သည် အိန္ဒိယ အစိုးရ အား ဆန့်ကျင်တွန်းလှန်နေသည့် သူပုန်အဖွဲ့များကို အင်အားကြီးထွားအောင် လုပ်ပေးပြီး ချင်းပြည်နယ် အတွင်းရှိ တော်လှန်‌ရေး အင်အားစုများ ကို ချေမှုန်းနိုင်ရန် အမြတ်ထုတ်နေကြပြီ ဖြစ်သည်။
ဘီလီယံ ပေါင်း များစွာ ရင်းနှီးမြုပ်နှံထားသော တရုတ်၏ ဩဇာအာဏာကို တန်ပြန်နိုင်ရန် ဆက်ဆံနေရပါသည် ဆိုသော အကြောင်းပြချက်သည် မည်သို့မျှ အကျိုးထူးမည် မဟုတ်သည့် ဗျုဟာလည်း ဖြစ်နေသည်။ တရုတ်သာ မက ၎င်းတို့၏ မဟာရန်သူတော်ကြီး ဖြစ်သော ပါကစ္စတန်သည် စစ်အာဏာသိမ်း အဖွဲ့ကို လက်နက်များ၊ လေယာဉ်များ ရောင်းချ၍ အမြတ်ထွက်နေကြသည် ဆိုသည်ကိုလည်း သတိမူသင့်သည်။
၎င်းတို့၏ ကုလားတန် မြစ်ကြောင်း စီမံကိန်း နှင့် ထိုင်း-မြန်မာ-အိန္ဒိယ အဝေးပြေး လမ်းစီမံကိန်းသည် လည်း ၎င်းတို့ အာဏာ သက်ဆိုးရှေ ရည်း အတွက် မနည်း ရုန်းကန်နေရသော အာဏာသိမ်း အဖွဲ့ထံမှ မည်သို့သော ပံ့ပိုးပေးမှုများ ရနိုင်ပေဦးမည်နည်း။ 
ထိုင်း
ထိုင်း၏ အဓိက ရည်ရွယ်ချက်သည် ၎င်းတို့ အတွက် သဘာဝ ဓါတ်ငွေ့များ မှန်မှန် ရနိုင်ရေး အတွက်ပင် ဖြစ်သည်။ သို့သော် ထိုင်း တနိုင်ငံလုံး မီးထိန်ထိန် လင်းနိုင်ရန် လျပ်စစ်ဓါတ်အား၏ ၆၀ ရာနှုန်းကို ဓါတ်ငွေ့မှ ရရှိနေပြီး မြန်မာ၏ ရတနာ လုပ်ကွက်မှ ထွက်သော ဓါတ်ငွေ့သည် ၁၁ ရာနှုန်း ပါဝင်နေသည်။ ယူကရိန်း စစ်ပွဲကြောင့် မြန်မာ မှ ဓါတ်ငွေ့များ ယခင်ကထက် ပို၍ လိုအပ်နေသည်။ နော်ဝေး အစိုးရသည် ထိုင်း ၏ PTTEP တွင် ရင်းနှီးမြုပ်နှံမှု များ မြန်မာ စစ်အာဏာသိမ်း အဖွဲ့ နှင့် ပတ်သက်နေ၍ ဆိုကာ ရုပ်သိမ်းသွားခဲ့ပြန်သည်။
ထိုင်းသည် နယ်ခြား လုံခြုံရေး နှင့် မြန်မာပြည်သူတို့၏ ထောက်ခံမှု ရရှိရန် တော်လှန်ရေး အင်အားစုများကို သိုသိုသိပ်သိပ် ကူညီရမည့် အချိန်ရောက်ပြီ ဖြစ်သည်ဟု ဆောင်းပါးတွင် ဖေါ်ပြထားသည်။
နောက်ထပ် ရရှိသော သတင်းအရ စင်္ကာပူ ပါလီမန် တွင် အတိုက်အခံ အလုပ်သမား ပါတီမှ အမတ်၏ အမေးကို ဖြေဆိုရာတွင် စင်္ကာပူသည် မြန်မာ အား လက်နက် မရောင်းချတော့သည်မှာ ကာလ ကြာမြင့်လှပြီ ဖြစ်ကြောင်း၊ ဆယ့်ငါးနှစ် ခန့်ပင် ရှိနေပြီ ဟု နိုင်ငံခြားရေး ဝန်ကြီး ဗီဗီယန် ဘလာခရစ်ရှနန် က ဖြေဆိုသွားသည်။
သို့သော် အမတ်က မြန်မာ အထူးအကြံပေး ကောင်စီ၏ အစီရင်ခံစာ ကို ရည်ညွှန်း မေးမြန်းခဲ့ခြင်း ဖြစ်ကြောင်း ထောက်ပြသည့် အခါ ထိုအစီရင်ခံစာပါ အချက်အလက် အများစုသည် စစ်အာဏာမသိမ်းမီ ကာလများကို ရည်ညွှန်းထားခြင်း ဖြစ်သည်ဟု ဝန်ကြီးက ဆိုသည်။
လက်နက်တွင်သာ လက်နက် ထုတ်လုပ်ရေး ပိုင်းတွင် အသုံးပြုနိုင်သည်ဟု ယူဆရသော ပစ္စည်း မှန်သမျှ အတွက် ပို့ကုန် လိုင်စင် လျှောက်ထားသည့် ကုမ္ပဏီများအားလည်း အန္တရာယ်ရှိကြောင်း သတိပေး အလံနီ ထောင်ပြခဲ့စမြဲ ဖြစ်သည်ဟု ဆိုသည်။
မည်သို့ပင် ဆိုစေ နိုင်ငံတွင်း မငြိမ်မသက် ဖြစ်နေမှုများ အား နှိမ်နှင်းရန် အသုံးပြုနိုင်သည် မှန်သမျှ ကိုပင် ခွင့်မပြုခဲ့ဟု တရားဝင် ငြင်းဆိုသွားခဲ့သည်။
ပြည်သူတို့၏ ခုခံစစ် မုချ အောင်ရမည်!!!

လှစိုးဝေ
သတင်း ဓါတ်ပုံ - Radio Free Asia