ပေါက်တောဝမီးပွိုင့်အနီးရှိ စစ်တပ်ဘန်ကာအား အဝေးထိန်းမိုင်းဖြင့်ဖောက်ခွဲတိုက်ခိုက်

အင်းစိန် ပေါက်တောဝမီးပွိုင့်အနီးရှိ စစ်တပ်ဘန်ကာအား MUPDF ကအဝေးထိန်းမိုင်းဖြင့်ဖောက်ခွဲတိုက်ခိုက်

​ကျော်​ဇော၊သုည ၊ People's Spring

ရန်ကုန်မြို့ အင်းစိန်မြို့နယ်တွင် စစ်ကောင်စီတပ်၏လုံခြုံ

ရေးဘန်ကာတစ်ခုကို အဝေးထိန်းမိုင်းဖြင့်ဖောက်ခွဲတိုက်

ခိုက်ခဲ့ကြောင်း Myanmar Underground People Defense Force (MUPDF)အဖွဲ့တာဝန်ခံ စ​နေက 

ပြောသည်။

အင်းစိန်ထောင်အနီး ပေါက်တောဝမီးပွိုင့်ရှိ စစ်တပ်ဘန် ကာအား ယမန်နေ့(ဖေဖော်ဝါရီ ၁၈)နံနက် ၄ နာရီ ၃၃ မိနစ်ခန့်တွင် URF ၏နည်းပညာအကူအညီဖြင့် အဝေးထိန်းမိုင်းနှင့် ဖောက်ခွဲတိုက်ခိုက်ခဲ့ခြင်းဖြစ်သည်။

"(စစ်ကောင်စီတပ်သားများ)ကြိမ်းသေထိခိုက်မယ်။ သေမသေတော့ မသိရသေးပါဘူး။ ဖြိုတာက ဘန်ကာကိုဗျ။ C4 သုံးထားတာ၊ ထည့်တာနည်းသွားလို့ မဖြိုလိုက်နိုင်ဘူး"ဟု MUPDF မှ တပ်ဖွဲ့တာဝန်ခံ စ​နေက People's Spring သို့ ပြောသည်။

အဝေးထိန်းမိုင်းဖြင့် ဖောက်ခွဲတိုက်ခိုက်ခဲ့သော စစ်တပ်နှစ်ထပ်ဘန်ကာတွင် အပေါ်ထပ်၌ စစ်ကောင်စီတပ်သားသုံးဦး

ခန့်ရှိပြီး ဘန်ကာအောက်ဘက် သဲအိတ်များအကာ အကွယ်ယူထားသည့်နေရာတွင် စစ်ကောင်စီတပ်သားသုံးဦးခန့်ရှိကာ ထိခိုက်မှုရှိနိုင်ကြောင်း၎င်းကရှင်းပြသည်။

"မနေ့က မနက်အစောပိုင်းပေါက်တောဝဘက်မှာပေါက်ကွဲသံ တစ်ချက် အကျယ်ကြီး ကြားလိုက်ရတယ်။ မီးပွိုင့်နားက ဘန်ကာမှာ ပေါက်တာလို့တော့ ကြားတယ်။အဲ့မှာကစစ်သားတွေတော့ အမြဲစောင့်နေတာ တွေ့ရတယ်။ လူထိခိုက်မှု ရှိ၊ မရှိ တော့ မသိပါဘူး " ဟု အင်းစိန်မြို့နယ်နေပြည်သူတစ်ဦးကပြောသည်။

ယနေ့ (​ဖေ​ဖော်ဝါရီ ၁၉ )နံနက်ပိုင်းတွင် ပေါက်ကွဲမှု ဖြစ်ပွားခဲ့သည့် အင်းစိန်မြို့နယ် ပေါက်တောဝ၊ ရွာမ၊ ဒညင်းကုန်း၊ ဖော့ကန်ရပ်ကွက် တို့၌ စစ်ကောင်စီဝင်ကားများ ကင်းလှည့်လည်နေကြောင်းဒေသခံအချို့ကပြောသည်။

ယခုစစ်ရေးတိုက်ခိုက်မှုသည် Myanmar Underground People Defense Force - MUPDF ၏ ပြည်သူသို့အသိပေးသော (၅)ပွဲမြောက် စစ်ရေးတိုက်ခိုက်မှုဖြစ်ပြီး ယင်းတိုက်ခိုက်မှုများအနက် ရွှေပေါက္ကံမြို့သစ်၊ တောင်ငူလမ်း၊ ဘောလုံးကွင်းအနီးရှိ စစ်ကောင်စီတပ်စခန်းတစ်ခုအား RPG ဖြင့် ပစ်ခတ်နိုင်ခဲ့သည့်လှုပ်ရှားမှုမှာ အားအရဆုံးဖြစ်ကြောင်း MUPDF က People's Spring အား ရှင်းပြသည်။

"တော်လှန်ရေးဟာ အောင်ကိုအောင်ရမယ်ဆိုတဲ့အောင်စိတ်ထားပေးကြဖို့နဲ့။တော်လှန်ရေးရဲဘော်တွေအဖွဲ့အစည်းတွေနဲ့ယခုထပ်ပို နားလည်မှုရှိစွာ၊ယုံကြည်မှုရှိစွာ လက်တွဲကြဖို့မေတ္တာရပ်ခံချင်ပါတယ်ခင်ဗျာ။ကျွန်တော်တို့ MUPDFရဲ့ ပြည်သူတွေအပေါ်ထားတဲ့ သဘောထားကလဲ။ပြည်သူသာလျှင် အဓိကပါပဲ။ဒါကြောင့်ပြည်သူတွေရဲ့ရှေ့မှာအမြဲ

ရပ်တည်သွားမှာပါ။ အမြဲကာကွယ်သွားမှာပါ "ဟု စ​နေက​ပြောသည်။

ပြည်သူများအနေဖြင့်လည်းစစ်​ကောင်စီတပ်၏ကင်းစခန်းများ ဂိတ်များကို ဝေးရာမှ ရှောင်ကျဥ်သွားကြရန်လည်း  MUPDFက​မေတ္တာရပ်ခံသည်။

ဖေဖော်ဝါရီ ၁၂ ရက်နေ့ညပိုင်းကလည်း အင်းစိန်ပန်းခြံအနီး ကျယ်လောင်သည့် ပေါက်ကွဲမှုတစ်ခုဖြစ်ပွားခဲ့ပြီး အလားတူ ယခုလအတွင်း အင်းစိန်ရွာမအုပ်ချုပ်ရေးမှူးရုံး ဖောက်ခွဲတိုက်ခိုက်ခံခဲ့ရသေးသည်။

(ရတ်ကုန်မြို့ရှိ စစ်​ကောင်စီ၏ ဘန်ကာတစ်ခု။ဓါတ်ပုံ-CJ)