ကော်ဘရာဂိုး စစ်ရေးလေ့ကျင့်မှု ထိုင်းက မြန်မာစစ်တပ်ကို မဖိတ်

ဧရာဝတီ၊ ဖေဖော်ဝါရီ ၁၉၊ ၂၀၂၃  

ထိုင်းနိုင်ငံတွင် ကျင်းပမည့် အင်ဒိုပစိဖိတ်ဒေသတွင်း အကြီးဆုံး စစ်ရေးပူးပေါင်းလေ့ကျင့်မှုဖြစ်သော ကော်ဘရာဂိုး (Cobra Gold) စစ်ရေးလေ့ကျင့်မှုတွင် မြန်မာစစ်တပ်ကို ဖိတ်ကြားသွားမည် မဟုတ်ဟု ထိုင်းတော်ဝင်တပ်က ဗိုလ်ချုပ် Thitichai Thienthong ကပြောဆိုလိုက်ကြောင်း ထိုင်းအခြေစိုက်သတင်းဌာနများတွင် ဖော်ပြထားသည်။

လာမည့် ဖေဖော်ဝါရီ ၂၇ ရက်နေ့မှ မတ်လ ၁၀ ရက်အထိ နှစ်ပတ်ကြာ ကျင်းပသွားမည့် ထိုစစ်ရေးလေ့ကျင့်မှု အခမ်းအနားမှာ ထိုင်ခုံအရေအတွက် ကန့်သတ်ထားခြင်းကြောင့် မြန်မာကို မဖိတ်ကြားတော့ခြင်း ဖြစ်ကြောင်း ၎င်းက ဆိုသည်။

ယခုနှစ် စစ်ရေးလေ့ကျင့်မှုကို အမေရိကန်စစ်တပ် နှင့် ထိုင်းစစ်တပ်တို့က စစ်အင်အားအများဆုံးဖြင့် ဦးဆောင် စစ်ရေးလေ့ကျင့်ကြခြင်းဖြစ်ကာ စင်ကာပူ၊ အင်ဒိုနီးရှား၊ ဂျပန်၊ တောင်ကိုရီးယား နှင့် မလေးရှား စသည့် ၇နိုင်ငံက စစ်သည်ပေါင်း ခုနစ်ထောင်ကျော်လည်း ပါဝင်မည်ဖြစ်သည်။  

ယခင်က မြန်မာစစ်တပ်အနေဖြင့် ကော်ဘရာဂိုးစစ်ရေးလေ့ကျင့်မှုတွင် လေ့လာသူအနေဖြင့် တက်ရောက်ခွင့်ရခဲ့သော်လည်း  စစ်အာဏာသိမ်းခဲ့သော ၂၀၂၁ ခုနှစ် ဖေဖော်ဝါရီ ၁ ရက်နေ့ မှ စတင်ပြီး ထိုစစ်ရေးလေ့ကျင့်မှု အစီအစဉ်တွင် ပါဝင်ခွင့် မရတော့ခြင်း ဖြစ်ရာ ယခုနှစ် နှင့်ဆိုလျှင် သုံးကြိမ်မြောက် ရှိလာပြီ ဖြစ်သည်။

ပြီးခဲ့သည့်နှစ်က ကော်ဘရာဂိုးစစ်ရေးလေ့ကျင့်မှုကို ကိုဗစ်ကပ်ရောဂါကြောင့်စစ်သည်အင်အားကို ယခင်ထက် လျှော့ချပြုလုပ်ခဲ့ပြီး အမေရိကန်၊ ထိုင်းစစ်တပ်တို့နှင့်အတူ အင်ဒိုနီးရှား၊ တောင်ကိုရီးယား၊ စင်ကာပူ၊ မလေးရှား၊ တရုတ်၊ သြစတြေးလျ၊ ဂျပန် နှင့် အိန္ဒိယတို့က စစ်သည် ထောင်နှင့်ချီကာ လေ့ကျင့်မှုများ ပြုလုပ်ခဲ့ကြသည်။ 

#WhatsHappeningInMyanmar

#RejectMilitaryCoup