အေးဂျင့်နဲ့မရတော့ MOU နဲ့ သွားကြတယ်

ပတ်စ်ပို့ရုံးများ ပိတ်ထား၍ ပြည်ပထွက် အလုပ်လုပ်မည့်သူများ အခက်အခဲဖြစ်၊ တရားမဝင်လမ်းကြောင်းဖြင့် ပြည်ပ သွားရောက်သူများလည်း ရှိနေ

ဧရာဝတီတိုင်းမ်

ဖေဖော်ဝါရီလ ၁၅ ရက်

စစ်အာဏာသိမ်းပြီနောက် ၂၀၂၂ ခုနှစ် ဒီဇင်ဘာလတွင် မြန်မာ တစ်နိုင်ငံလုံးရှိ ပတ်စ်ပို့ရုံးများပိတ်လိုက်ခြင်းကြောင့် ပြည်ပထွက်ခွာ အလုပ်လုပ်မည့် သူများအတွက် အခက်အခဲများစွာ ကြုံတွေ့နေကြရကြောင်း ဒေသတွင်းအလုပ်အကိုင် ရှာဖွေရေး အဖွဲ့များထံမှ သိရသည်။

အကြောင်းပြချက် မရှိဘဲ နိုင်ငံကူး လက်မှတ် ပတ်စ်ပို့ (Passport) ရုံးများကို ပိတ်ထားခဲ့ခြင်းဖြစ်ပြီး ၂၀၂၃ဖေဖော်ဝါရီလ အထိ ပြန်လည် ဖွင့်လှစ်ပေးခြင်း မရှိသေး၍ ပြည်ပထွက် အလုပ်လုပ်မည့်သူများမှာတရားမဝင် လမ်းကြောင်းများဖြင့် သွားသူများလည်း ရှိနေသည်။

ဧရာဝတီတိုင်း မြောင်းမြမြို့နယ်မှ အသက် ၂၀ အရွယ် လူငယ် အမျိုးသားတစ်ဦးက“အခုလို ပြည်တွင်းအလုပ်အကိုင် ရှားပြီး ကုန်ဈေးနှုန်းတွေ တက်နေချိန်မှာ အများစုက နိုင်ငံခြားရောက်နေပြီ။ကျနော်တို့လည်း အကုန်လုပ်ပြီးပြီ။ ပတ်စ်ပို့ပဲ ကျန်တော့တာ၊ အေးဂျင့်နဲ့လည်း ချိတ်ပြီး အခု ရုံးတွေကပိတ်ထားတော့ အစ်ကိုဝမ်းကွဲတွေက အောက်လမ်းကနေပဲ လာလို့ ပြေားတယ်။ ရှေ့လထဲမှာကျနော်လည်း သွားတော့မှာပါ။ ပိုက်ဆံက အစ အစ်ကိုတွေက ထုတ်ပေးတော့အဆင်တော့ပြေပါတယ်။ အောက်လမ်းက သွားတဲ့အတွက် အဖမ်းခံရမှာပဲ ပူတာပါ”ဟုဧရာဝတီတိုင်းမ်ကို ပြောသည်။

ဖေဖော်ဝါရီလ ၁၀ ရက်နေ့က ထိုင်း-မြန်မာ နယ်စပ်မှာ ကားပေါ်တွင် တရားမဝင် တင်ဆောင်လာသောမြန်မာနိုင်ငံသား ၁၀ ဦး ဖမ်းဆီးခံရကြောင်း သတင်းများတွင် ဖော်ပြထားသည်ကိုလည်း တွေ့ရသည်။အဆိုပါ ပတ်စ်ပို့ ရုံးများကို ၂၀၂၃ ခုနှစ် ဇန်နဝါရီ လကုန်တွင် လျှောက်ထားမှု လုပ်ငန်းစဉ်အသစ်တစ်ခုဖြင့် ပြန်လည် ဖွင့်လှစ်သွားမည်ဟု အာဏာသိမ်း စစ်ကောင်စီ၏ သတင်း ပြန်ကြားရေးအဖွဲ့ ခေါင်းဆောင် ဗိုလ်ချုပ် ဇော်မင်းထွန်းက သတင်းစာ ရှင်းလင်းပွဲးတစ်ခုတွင်ပြောကြားထားသည်။

ယခု ဖေဖော်ဝါရီလတွင် MOU သမားများနှင့် ဗုဒ္ဓဂယာ ဘုရားဖူးသွားမည့် သူများကိုသာ ပတ်စ်ပို့ ထုတ်ပေးနေကြောင်းလည်း သိရသည်။

ရန်ကုန်မြို့ရှိ အလုပ်သမား အေးဂျင့် တစ်ဦးကလည်း“သူတို့က ပိတ်ထားတာကြာပြီ။ ပြီးခဲ့တဲ့ ဇန်နဝါရီလထဲက စနစ် ပြုပြင်နေလို့ လို့ပြောတယ်။ အခုထိတော့ ဘာမှ မထူးသေးပါဘူး။ လက်ရှိမှာ ကျနော့်ဆီမှာလည်း လူတွေများနေပြီ။ အကုန် နားနေရတယ်။ အခုကြားတာက PJ ရဖို့ကို အသနားခံစာ တင်ရမယ်လို့လည်း ပြောတယ်။ တချို့တွေကတော့ တင်နေတယ်ကြားတယ်။ ရမရတော့ မသိပါဘူး။ ကျနော်တို့လည်း စောင့်နေရတုန်းပါ”ဟု ဧရာဝတီတိုင်းမ်ကို ပြောပြသည်။

၎င်းက ဆက်လက်ပြီး“တချို့တွေက အေးဂျင့်နဲ့မရတော့ MOU နဲ့ သွားကြတယ်။ အခုလည်း ထိုင်းရောက် MOU သမားတွေ အကုန် အလုပ်မဲ့ဖြစ်နေကြပါတယ်။ ကူညီတဲ့ အဖွဲ့တွေဆီမှာလည်း အများကြီး သောင်တင်နေကြရတယ်လို့ ကြားပါတယ်” ဟုလည်း ပြောသည်။

ထို့ပြင် နိုင်ငံကူးလက်မှတ် ပြုလုပ်ခြင်းနှင့် ပတ်သက်ပြီး အကျိုးဆောင် ကုမ္ပဏီ ၁၄၃ ခုကို နာမည်ပျက်စာရင်း (Black List) သွင်းရန် ညွှန်ကြားချက်အရ စိစစ်ရာတွင် ပြည်ပ အလုပ်အကိုင် အကျိုးဆောင် လိုင်စင်ရ အေဂျင်စီ ၁၃၃ ခု ပါဝင်နေသည် ကို စိစစ်တွေ့ရှိရသည်ဟု နေပြည်တော်ရှိ အလုပ်သမား ဝန်ကြီးဌာနက ထုတ်ပြန်ထားကြောင်းလည်း သိရသည်။

အဆိုပါ အေဂျင်စီ ၁၃၃ ခုအား နိုင်ငံကူးလက်မှတ် ပြုလုပ်ခွင့် တင်ပြမှု စာရင်းတွင် ပါဝင်မှု မရှိစေရေး သေချာစွာ စိစစ် ဆောင်ရွက်သွားရန် ဇန်နဝါရီလ ၂၂ ရက်နေ့က စာထုတ်အသိပေး အကြောင်းကြားထားသည်ဟုလည်း ဆိုသည်။

 

 

#ပတ်စ်ပို့ရုံး #ပြည်ပ #အခက်အခဲ #တရားမဝင်လမ်းကြောင်း

#Ayeyarwaddy_Times