အိုးဘိုထောင်ကို ငရုတ်သီး၊ကြက်သွန် ပါဆယ်ပို့ခွင့်ပိတ်
နိုင်ငံရေးအကျဥ်းသူတချို့ တိုက်ပိတ်ခံရပြီးနောက် အိုးဘိုထောင်ကို ငရုတ်သီး၊ကြက်သွန် ပါဆယ်ပို့ခွင့်ပိတ်
၁၈ ဖေဖော်ဝါရီ ၂၀၂၃, BBC
မန္တလေး အိုးဘိုအကျဉ်းထောင်အတွင်းမှာ နိုင်ငံရေး အကျဉ်းသူတချို့ ဒီလဆန်းက အကြမ်းဖက် ရိုက်နှက်ခံရပြီး တိုက်ပိတ်ခံရ၊ ထောင်ဝင်စာ ၁ လပိတ်ခံရပြီးနောက် အမျိုးသမီးဆောင်ကို ပါဆယ်ဆက်ပို့ခွင့်ရနေသူအတွက် ငရုတ်သီး၊ ခရမ်းချဉ်သီး၊ ကြက်သွန်နီတွေပါ ထည့်သွင်းပေးပို့ခွင့် ပိတ်လိုက်တယ်လို့ အမျိုးသမီးဆောင်ကို ဆက်ပို့ခွင့်ရနေသူနဲ့ နီးစပ်သူတွေက ပြောပါတယ်။
" အိုးဘိုထောင်အတွင်း ငရုတ်သီးနဲ့ပတ်သက်တာ သွင်းခွင့်မရှိတော့ဘူး။ ငါးခြောက်တွေကြော်ရင် ငရုတ်သီးပါတာ မဟုတ်လား။ အဲ့ဒါ သွင်းခွင့်မပေးတော့ဘူး။ ငရုတ်သီးအစိမ်းတောင် မရတော့ဘူး။ ကန့်သတ်သွားတာ။ အတွင်းမှာ အသုပ်သုပ်စားလို့ရအောင် ခရမ်းချဉ်သီး၊ ကြက်သွန်နီတွေ အကျဉ်းသူတွေနား ရှိတယ်။ သူတို့(ထောင်ဝန်ထမ်း) အန္တရာယ်ပြုချိန်မှာ အဲ့ဒါတွေနဲ့ လှမ်းပေါက်လို့တဲ့။ ခရမ်းချဉ်၊ ကြက်သွန်ကို ကြောက်နေကြတာ"လို့ လက်ရှိ အိုးဘိုထောင်တွင်း ပါဆယ်ပို့ခွင့်ရသူတွေရဲ့ ကန့်သတ်ထားတဲ့ အစားစာ အခြေနေအကြောင်းကို ထောင်တွင်း နီးစပ်သူတစ်ဦးက ပြောပါတယ်။
ဖေဖော်ဝါရီ ၄ ရက်နေ့က မန္တလေး အိုးဘိုအကျဉ်းထောင်ရဲ့ အိပ်ဆောင်အမှတ်(၁)က အမျိုးသမီးအကျဉ်းဆောင်မှာ ရေနွေးတောင်းရာကနေ ထောင်ဝန်ထမ်းတွေနဲ့ နိုင်ငံရေးအကျဉ်းသူတွေ စကားများရန်ဖြစ်ခဲ့ပါတယ်လို့ သူက ပြောပါတယ်။
အမျိုးသမီး ထောင်အရာရှိနဲ့ ဝန်ထမ်းတွေက ပြဿနာကို ပြေလည်အေင်ဖြေရှင်းပေးတာ မရှိဘဲ အကျဉ်းထောင် ဝန်ထမ်း နဲ့ စည်းကမ်းထိန်းသိမ်းရေး အမျိုးသားအကျဉ်းသားတွေက အင်အား ၁၅၀ ခန့်နဲ့ ဝင်ရောက် အကြမ်းဖက် ရိုက်နှက်ခဲ့တယ်လို့ NUG က ပြောထားပါတယ်။
သံတုတ်၊ ဝါးဆစ်ပိတ်၊ လောက်လေးခွ၊ ကွန်ကရစ် လောက်စာလုံး၊ ကျဥ်စက်တွေကို အသုံးပြုပြီး ရိုက်နှက်ခဲ့လို့ နိုင်ငံရေးအကျဉ်းသူ ၁၀၀ကျော် ထိခိုက်ဒဏ်ရာရပြီး ၂၁ ဦး ဒဏ်ရာပြင်းထန်တယ်လို့ အမျိုးသားညီညွတ်ရေး အစိုးရ(NUG)ရဲ့ လူ့အခွင့်ရေး ဆိုင်ရာ ဝန်ကြီးဌာနက ထုတ်ပြန်ထားပါတယ်။
ဒဏ်ရာရသူတွေမှာ ဦးခေါင်းကွဲ၊ နားရွက်ပြတ်ရှ၊ လက်ကျိုး၊ မျက်လုံးအနီး လေးခွမှန်၊ မျက်လုံး မျက်မှန်စဝင် ဒဏ်ရာရရှိတာတွေ ရှိပေမယ့် လုံလောက်တဲ့ ဆေးကုသမှု မရရှိလို့ ကျန်းမာရေးအခြေနေ စိုးရိမ်ရပြီး နောက်ရက်များတွေမှာ လိင်အကြမ်းဖက်မှုတွေပါ ရှိလာနိုင်တယ်လို့ ထုတ်ပြန်ချက်မှာ ဖော်ပြထားပါတယ်။
ဒါ့အပြင် နိုင်ငံရေး အကျဉ်းသူ အမျိုးသမီး ၇၂ ဦးကို အစားစာ၊ အဝတ်ထည်နဲ့ အသုံးဆောင်ပစ္စည်း ယူဆောင်ခွင့်မပေးဘဲ ပြစ်ဒဏ်တိုက်ကို ပြောင်းရွှေ့ပြီး ထောင်ဝင်စာ ၁လ ပိတ်ပင်ခဲ့သလို နိုင်ငံရေးအကျဉ်းသူ နှစ်ဦးလည်း တိုက်ပိတ်ခံရပါတယ်။ အဲ့ဒီနောက်ရက်မှာ အိုးဘိုအကျဉ်းထောင် အမျိုးသမီးအိပ်ဆောင် (၄) နဲ့ (၅) မှာလည်း နိုင်ငံရေးအကျဉ်းသူတွေကို အကြမ်းဖက် အကြိမ်ကြိမ်ရိုက်နှက်ခဲ့တယ်လို့ ဆိုပါတယ်။
ပြဿနာဖြစ်ပြီးနောက် နိုင်ငံရေး အကျဉ်းသူ အမျိုးသမီးတချို့ ပါဆယ်ပို့ခွင့်ရသူ ရှိပေမဲ့ ဒီနေ့အချိန်ထိ ထောင်တွင်းက ပြန်စာတွေ အပြင်ကို ရောက်မလာဘူးလို့ နိုင်ငံရေး အကျဉ်းသူ မိသားစုဝင်တွေက ပြောပါတယ်။
" ပါဆယ်ပို့ခွင့် ပိတ်ထားခံရတဲ့ ဦးရေ အများကြီးပဲ။ ကိုယ့်ကလေးက အဲဒီထဲမပါဘူးလေ။ ဒါပေမဲ့ ကလေးဆီကစာ ခုထိမရောက်သေးဘူး။ ခါတိုင်းဆို ၁၅ ရက်တစ်ခါ ထွက်လာတယ်။ နေကောင်းတယ်။ ကျန်းမာတယ်။ ဘယ်လိုဘယ်ညာဆိုတာ။ တစောင်မှ ထွက်မလာသေးဘူး"လို့ နိုင်ငံရေး အကျဉ်းသူ မိသားစုဝင်တစ်ဦးက တွေ့ကြုံနေရတာကို ပြောပါတယ်။
အိုးဘိုထောင်တွင်း အကြမ်းဖက်မှုနဲ့ ဆေးကုသခွင့်နဲ့ပတ်သက်လို့ နေပြည်တော် အကျဉ်းဦးစီးဌာနကို ဆက်သွယ်ခဲ့ပေမဲ့ ပြန်လည်ဖြေကြားတာ မရှိပါဘူး။
စစ်အာဏာသိမ်းပြီးနောက် နိုင်ငံတဝန်းက အကျဉ်းထောင်တွေမှာ အကြမ်းဖက် ရိုက်နှက်တာ၊ တိုက်ပိတ်တာ၊ ဆေးကုသခွင့် မလုံလောက်တာ၊ ထောင်ပြောင်းရွှေ့တာတွေကို နိုင်ငံရေးအကျဉ်းသားတွေ ပြုလုပ်နေတယ်လို့ လူ့အခွင့်စောင့်ကြည့်သူ ထောင်တွင်းနီးစပ်သူတွေက ပြောပါတယ်။
စစ်အာဏာသိမ်းပြီးနောက် ဒီနှစ် ဖေဖော်ဝါရီ ၁၇ ရက်နေ့ထိ ဖမ်းဆီးချုပ်နှောင်ခံထားရသူ ၁၅၈၈၂ ဦးရှိပြီး ထောင်ဒဏ်ချမှတ်ခံရသူက ၄၃၉၈ ဦးဖြစ်တယ်လို့ နိုင်ငံရေးအကျဉ်းသားများ ကူညီစောင့်ရှောက်ရေးအသင်း AAPP ရဲ့ မှတ်တမ်းတွေအရ သိရပါတယ်။
Comments