စစ်မှုထမ်းဟောင်းများကို နေ့စားခ ၁ သောင်းပေးပြီး အသုံးပြုနေ

မအူပင်မြို့တွင် စစ်မှုထမ်းဟောင်းများကို နေ့စားခ ၁ သောင်းပေးပြီး စစ်ကောင်စီက လုံခြုံရေးအတွက် ပြန်လည်အသုံးပြုနေရ

နွေဦးမောင်/ဧရာဝတီတိုင်းမ်

(မအူပင်)၊ ဖေဖော်ဝါရီလ ၁၈ ရက်

ဧရာဝတီတိုင်း၊ မအူပင်မြို့နယ်မှာ စစ်ကောင်စီတပ်သားတွေနဲ့ ရဲတပ်ဖွဲ့လုံခြုံရေး အင်အားလျော့နည်းလာတာကြောင့် စစ်မှုထမ်းဟောင်း ဝန်ထမ်း တွေကို နေ့စားခပေးပြီး လုံခြုံရေး စောင့်ခိုင်းတာတွေနဲ့ ကင်းလှည့်ခိုင်းတဲ့နေရာတွေမှာ အသုံးပြုနေရတယ်လို့ သိရပါတယ်။

စစ်မှုထမ်းဟောင်းဝန်ထမ်းတွေကို နေ့စားခ တစ်နေ့ ၁ သောင်းပေးပြီး မြို့ပေါ်မှာရှိတဲ့ ကင်းစောင့်တဲ့နေရာတွေနဲ့ ကင်းလှည့်တဲ့နေရာတွေမှာ ပြောက်ကျားယူနီဖောင်းတွေ ပြန်ထုတ်ပေးပြီး အသုံးပြုနေရတာလို့ စစ်ကောင်စီတပ်နဲ့ နီးစပ်သူတွေဆီက သိရပါတယ်။

“ တစ်နေ့ကို တစ်သောင်းပေးပြီး ကင်းလှည့်တာတွေရော ကင်းစောင့်တာတွေရော သုံးနေတာ၊ ဧည့်စာရင်းစစ်တာတွေမှာလည်းပါတယ်၊ စစ်မှုထမ်းဟောင်းရော၊ သတင်းပေး ဒလန်တွေရော ပြောက်ကျား ဝတ်ခိုင်းပြီး သုံးနေတာ”လို့ ဒေသခံ အသက် ၄၀ အရွယ် အမျိုးသမီးတစ်ဦးက ဧရာဝတီတိုင်းမ်ကို ပြောပါတယ်။

စစ်ကောင်စီတပ်က အင်အားလျော့နည်းလာလို့ လုံခြုံရေးအတွက် နေ့စားခပေးကာ ခေါ်ယူပြီး အင်အင်းဖြည့်အသုံးပြုနေတဲ့အထဲမှာ စစ်မှုထမ်းဟောင်း၊ ပြည်သူ့စစ်နဲ့ သတင်းပေးတွေ ပါဝင်တယ်လို့ ဆိုပါတယ်။

လုံခြုံရေးအတွက် နေ့စားခ ၁ သောင်းပေးပြီး စစ်ကောင်စီတပ်က ခေါ်ယူအသုံးပြုနေတဲ့သူတွေဟာ ဒေသခံပြည်သူတွေ ခရီးသွားလာတဲ့အခါ စစ်ဆေးတာတွေပြုလုပ်ပြီး ငွေညှစ်တောင်းခံတာတွေ ပြုလုပ်နေတယ်လို့ သိရပါတယ်။