မင်းအုပ်စိုး နေအိမ်ကို စစ်တပ်က ချိတ်ပိတ်

စစ်အာဏာသိမ်းမှု ထောက်ခံသူ သရုပ်ဆောင် မင်းအုပ်စိုး ဓားပြမှု၊ ခြိမ်းခြောက်မှု၊ ပိုင်နက်ကျူးလွန်မှုများဖြင့် အမှုဖွင့်ခံရပြီး ထွက်ပြေးနေ၍ နေအိမ်ကို စစ်တပ်က ချိတ်ပိတ်

ရန်ကုန်၊ ဖေဖော်ဝါရီ ၁၆ ခေတ်သစ်

ရန်ကုန်တိုင်း၊ ဗဟန်းမြို့နယ်၊ ဖိုးစိန်လမ်းတွင် နေထိုင်သော သရုပ်ဆောင် မင်းအုပ်စိုးကို ဓားပြမှု၊ ခြိမ်းခြောက်မှု၊ပိုင်နက် ကျူးလွန်မှုများဖြင့် စစ်ကောင်စီက အမှုဖွင့်ထားပြီး ထွက်ပြေးနေ၍ ၎င်း၏ ဖိုးစိန်လမ်း နေအိမ်ကို ချိတ်ပိတ် လိုက်ကြောင်း သိရှိရသည်။

သရုပ်ဆောင်၊ ဒါရိုက်တာ မင်းအုပ်စိုးသည် ၂၀၁၄ ခုနှစ်၊ ဒီဇင်ဘာ ၂၅ ရက်နေ့ သူထုတ်ဝေသော သရပါ မဂ္ဂဇင်းမှအယ်ဒီ တာ မတေးနုယဥ်ကို သတ်ဖြတ်ခဲ့ပြီး လူသတ်မှုဖြင့် ၂၀၁၅ ခုနှစ် ဇူလိုင် ၂၉ ရက်နေ့တွင် ထောင်ဒဏ်တစ်သက် တစ်ကျွန်းချမှတ်ခံခဲ့ရကြောင်း၊ ၂၀၂၁ ခုနှစ်စစ်တပ်က အာဏာသိမ်းချိန်တွင် လွတ်ငြိမ်းသက်သာခွင့်ဖြင့် ပြန် လည် လွတ်မြောက်လာခဲ့ပြီး ထောင်မှ လွတ်လာပြီးနောက် ၂၀၂၂ ခုနှစ်ကုန်ပိုင်းတွင် OASIS တည်းခိုးခန်းကို မင်းအုပ်စိုးနှင့်အဖွဲ့က ဝင်ရောက် ရမ်းကားပြီး ရိုက်နှက် ဓားပြတိုက်ကြောင်း သိရှိရသည်။

ယင်းနောက် အရိုက်နှက်ခံရသူများက အမှုဖွင့်သဖြင့် မင်းအုပ်စိုးကို ဓားပြမှု၊ ဆဲဆိုမှု၊ ပိုင်နက်ကျူးလွန်မှု၊ခြိမ်းခြောက်မှုများဖြင့် ဗဟန်းမြို့နယ်ရဲတပ်ဖွဲ့က အမှုဖွင့်ပြီး တရားရုံးက ဖမ်းဆီးရန် ၀ရမ်းထုတ်ခဲ့ကြောင်း၊သို့ရာတွင် ထွက်ပြေး တိမ်းရှောင်နေသဖြင့် ၎င်း၏ ဗဟန်းမြို့နယ်၊ ဖိုးစိန်နေအိမ်ကို ယနေ့ ဖေဖော်ဝါရီလ ၁၆ ရက်နေ့တွင် စစ်တပ်က ချိတ် ပိတ်လိုက်ကြောင်း သိရှိရသည်။

“သူ့အိမ်မှာ ကပ်ထားတဲ့ ဝရမ်းတွေ ကပ်ထားတာ ၁၀ စောင်ကျော်တယ်။ မင်းအုပ်စိုးက သူ့အိမ်တခြမ်းကို Oasis တည်းခိုခန်းကိုငှားထားတယ်။ အဲဒါ တည်းခိုးခန်းကို မင်းအုပ်စိုးနဲ့အဖွဲ့က ဓားတွေကိုင်ပြီး လူတွေကို ရိုက်နှက်သောင်း ကျန်းတယ်” ဟု ဗဟန်းမြို့နယ်မှ သတင်းရင်းမြစ်တစ်ခုက ပြောသည်။

မင်းအုပ်စိုးသည် စစ်အာဏာသိမ်းပြီးနောက် ထောင်မှ လွတ်ငြိမ်းသက်သာခွင့်ဖြင့် ပြန်လည် လွတ်မြောက်လာချိန်တွင် ဒေါ်အောင်ဆန်းစုကြည်၊ NLD နှင့် စစ်အာဏာရှင် ဆန့်ကျင်ရေး လှုပ်ရှားမှုများကို ဆဲဆို ဝေဖန်ပြီး စစ်တပ်ထောက်ခံသူ ဖြစ်လာကြောင်း၊ စစ်ကောင်စီက ကျင်းပသည့် နေပြည်တော် အခမ်းအနားကို ဖိတ်ကြားခံခဲ့ရကြောင်းသိရှိရသည်။