မြန်မာစစ်တပ်ကို လက်နက်ရောင်းချမှု မရှိကြောင်း စင်ကာပူ ထပ်မံငြင်းဆို
■ မြန်မာနိုင်ငံကို လက်နက်မရောင်းဖို့ စင်ကာပူက ပိတ်ပင်ထားတာ အတော်ကြာနေပြီဖြစ်ပြီး၊ မြန်မာစစ်တပ်ကိုလက်နက်ရောင်းချတာမရှိဘူးလို့ စင်ကာပူနိုင်ငံခြားရေးဝန်ကြီး ဗီဗီယန် ဘာလာကရစ်ရှ်နန်က ထပ်ပြီးငြင်းဆိုလိုက်ပါတယ်။
ဖေဖော်ဝါရီလ ၁၄ ရက်နေ့က စင်ကာပူလွှတ်တော်အစည်းအဝေးမှာ အတိုက်အခံအလုပ်သမားပါတီ လွှတ်တော်အမတ်တစ်ဦးရဲ့ မေးခွန်းကို အခုလိုဖြေဆိုခဲ့တာလို့ CNA သတင်းဌာနက ဖော်ပြပါတယ်။
မြန်မာနိုင်ငံဆိုင်ရာ ကုလသမဂ္ဂအရာရှိဟောင်းတွေနဲ့ ဖွဲ့စည်းထားတဲ့ “မြန်မာ့အရေးအထူးအကြံပေးကောင်စီ (SAC-M)” အဖွဲ့ရဲ့ နောက်ဆုံးထုတ် အစီရင်ခံစာမှာ… ‘စင်ကာပူဟာ မြန်မာစစ်တပ်ရဲ့ လက်နက်ထုတ်လုပ်မှုမှာသုံးတဲ့ကုန်ကြမ်းပစ္စည်းတွေရဖို့ မဟာဗျူဟာမြောက် အရေးကြီးတဲ့ ကြားခံနိုင်ငံအဖြစ် ဆောင်ရွက်ပေးနေတယ်’ ဆိုပြီးဖော်ပြထားတာပါ။
ဒီအစီရင်ခံစာမှာ နာမည်တပ်ဖော်ပြထားတဲ့ စင်ကာပူကုမ္ပဏီတွေအနေနဲ့ မြန်မာစစ်တပ်ကို လက်နက်ရောင်းချမှုပိတ်ပင်ရေး ကန့်သတ်ချက်တွေကို လိုက်နာခြင်းရှိ၊ မရှိ စစ်ဆေးထားတာ ရှိပါသလားဆိုပြီး အလုပ်သမားပါတီအမတ် မစ္စတာတန်က လွှတ်တော်မှာ မေးမြန်းခဲ့ပါတယ်။
မြန်မာနိုင်ငံကို လက်နက် ဒါမှမဟုတ် လက်နက်အဖြစ် အသုံးပြုနိုင်တဲ့ ကုန်ပစ္စည်းတွေ လွှဲပြောင်းပေးပို့တာ ခွင့်ပြုမထားကြောင်း စင်္ကာပူ နိုင်ငံခြားရေးဝန်ကြီးဌာနက ဇန်နဝါလ ၁၈ ရက်နေ့က ငြင်းဆိုထားပြီး ဖြစ်ပါတယ်။
မြန်မာ့အရေး အထူးအကြံပေးကောင်စီရဲ့ အစီရင်ခံစာမှာ ဖော်ပြထားတဲ့ စင်္ကာပူနဲ့ မြန်မာစစ်တပ်ပိုင်လုပ်ငန်းတွေအကြား စီးပွားရေးအရ ဆက်ဆံမှုတွေဆိုတာလည်း ၂၀၂၁ ခုနှစ် စစ်တပ်အာဏာမသိမ်းခင်က ရှိခဲ့တဲ့ ကူးသန်းဆက်ဆံမှုတွေသာ ဖြစ်တယ်လို့ စင်္ကာပူ နိုင်ငံခြားရေးဝန်ကြီးက ပြောသွားပါတယ်။
ဖေဖော်ဝါရီ ၁၃ ရက်နေ့က ပြုလုပ်တဲ့ မြန်မာစစ်ကောင်စီရဲ့ ရင်းနှီးမြှုပ်နှံမှုကော်မရှင် အစည်းအဝေး သတင်းထုတ်ပြန်ချက်မှာတော့… ၂၀၂၃ ခုနှစ် ဇန်နဝါရီလကုန်အထိ မြန်မာနိုင်ငံမှာ ရင်းနှီးမြှုပ်နှံမှုအများဆုံး နိုင်ငံသုံးနိုင်ငံဟာစင်ကာပူ၊ တရုတ်နဲ့ ထိုင်းနိုင်ငံဖြစ်တယ်လို့ ဖော်ပြထားပါတယ်။
-----
၂ဝ၂၁ ခုနှစ် သြဂုတ်လ ၂ဝ ရက်နေ့က စင်္ကာပူနိုင်ငံခြားရေးဝန်ကြီးဌာနရုံးတွင် တွေ့ရသည့် နိုင်ငံခြားရေးဝန်ကြီးဗီဗီယန် ဘာလာ ကရစ်ရှ်နန်။ (Photo: Reuters)
Comments