ကန့်ဘလူတွင် ချုံခိုတိုက်ခံရသည့် စစ်တပ် အနီးရှိကျေးရွာကို ထပ်မံမီးရှို့

သူရမောင် myanmar-now
Published on Feb 22, 2023

ဖော်ဖော်ဝါရီ ၁၉ ရက်နေ့က မီးရှို့ခံရသည့် မြေမွန်ရွာ
စစ်ကိုင်းတိုင်းတွင် အကြိမ်ကြိမ် မီးရှို့ခံရသော အိမ် ၁၂၀ နီးပါးရှိရွာတွင် အိမ် ၂၀ ကျော်သာ ကျန်တော့သည်၊ သိုလှောင်ထားသည့် မြေပဲများကိုလည်း တပ်က မီးရှို့သွားသည်ဟု ဆိုသည်။စစ်ကိုင်းတိုင်း၊ ကန့်ဘလူမြို့နယ်အတွင်း ချုံခိုတိုက်ခံရသည့် စစ်တပ်က တိုက်ပွဲဖြစ်ရာအနီးရှိ ကျေးရွာကို ယမန်နေ့ (ဖေဖော်ဝါရီ ၂၁) မနက်ပိုင်းက မီးတင်ရှို့ကြောင်း ဒေသခံများနှင့် လက်နက်ကိုင်တော်လှန်သူများက ပြောသည်။ပြည်သူ့စစ် ခေါ် ပျူစောထီး ၆၀ ခန့်နှင့် စစ်သားများ မြို့အနောက်ခြမ်းသို့ စစ်ကြောင်းထိုးလာရာ မိုင်းခွဲ တိုက်ခိုက်ခဲ့သည်၊ ကျွန်းလှမြို့မြောက်ဘက် ၆ မိုင်ခန့်အကွာ ချောင်းကြားကျေးရွာအနီး တိုက်ခိုက်ခြင်းဖြစ်သည်ဟု ဒေသခံပြည်သူ့ကာကွယ်ရေးအဖွဲ့ (ပကဖ) မှ အဖွဲ့ဝင်တစ်ဦးက ပြောသည်။
“ပကဖအဖွဲ့တွေနဲ့ ထိတွေ့မှုရှိတယ်။ ကျွန်တော်တို့ပွိုင့်ကနေ မိသွားတာ ၄ ယောက် ထိသွားတာဗျ။ ကျွန်တော်တို့က မှန်ပြောင်းနဲ့ ကြည့်နေတာ၊ မြေပဲခင်းထဲမှာ လဲကျသွားတာ။ ဘယ်နှစ်ယောက် သေတယ်ဆိုတာတော့ တိတိကျကျ မသိရဘူးပေါ့” ဟု သူက ဆိုသည်။စစ်ကောင်စီတပ်က ပြန်လည် ခုခံသော်လည်း ကာကွယ်ရေးသမားများ ထိခိုက်မှု မရှိခဲ့ကြောင်း ပြောသည်။ ထို့နောက် တိုက်ခိုက်မှုဖြစ်သည့်နေရာနှင့် တစ်မိုင်အကွာရှိ ချောင်းကြားကျေးရွာထဲကို စစ်ကောင်စီတပ်သားများ ဝင်ရောက်သွားပြီးနောက် ကျေးရွာကို မီးတင်ရှို့ခဲ့သည်ဟု ဆိုသည်။
အိမ်ခြေ ၁၁၈ အိမ်ရှိသည့် အဆိုပါကျေးရွာမှ နေအိမ် ၃၆ လုံး၊ မြေပဲတင်း ရာနှင့်ချီ မီးလောင်ပျက်စီးခဲ့ကြောင်း ဒေသခံရွာသားတို့က ဆိုသည်။ အဆိုပါ ရွာသည် နှစ်ကြိမ်တိုင် စီးနင်းမီးရှို့ခံထားရကာ အိမ်ခြေ ၅၄ လုံး မီးလောင်ပျက်စီးခဲ့ပြီးဖြစ်သည်။ ယခုတစ်ကြိမ်တွင်မူ တစ်ရွာလုံး နေအိမ် ၂၈ လုံးသာ ကျန်တော့ကြောင်း ဒေသခံများက ပြောသည်။နေအိမ်ဆုံးရှုံးခဲ့ရသဖြင့် တောင်ယာတဲတွင် နေထိုင်နေရသည့် ဒေသခံ အမျိုးသမီးတစ်ဦးကမူ စစ်ကောင်စီတပ်က ပြည်သူ့ကာကွယ်ရေးတပ်များကို မတိုက်နိုင်တော့သဖြင့် လက်နက်မဲ့ ရွာသားတို့ကို အနိုင်ကျင့်ခြင်းဖြစ်ကြောင်း ပြောသည်။
“သူတို့ တကယ်သတ္တိရှိရင် PDF ‌တွေကို ရှာတိုက်လေ။ ခုက ဘာမှမဆိုင်တဲ့သူတွေကို ပတ်ရမ်းနေတာ။ လာပြီတဲ့ဆို ပြေးလိုက်ရပြန်ပြီ။ ရောက်တာနဲ့ အကုန်မီးရှို့တာ၊ တစ်ရွာလုံး ဘာမှမကျန်ဘူး၊ ကျွန်မတို့ဆို ဘာမှဆိုင်တာမဟုတ်ဘူး။ ကြွက်မနိုင် ကျီမီးနဲ့ရှို့နေတာ” ဟု ထိုအမျိုးသမီးက ဆိုသည်။ထိုအမျိုးသမီး၏ ပြောဆိုချက်နှင့် ပတ်သက်ပြီး စစ်ကောင်စီပြန်ကြားရေးအရာရှိတို့၏ တုံ့ပြန်ချက် ရရန် ကြိုးစားသော်လည်း ဖုန်းအဆက်အသွယ် မရသေးပေ။
စစ်ကောင်စီတပ်များ ချောင်းကြားရွာထဲတွင် တပ်စွဲ မီးရှို့နေစဉ် ကျွန်းလှမြို့မှ အရပ်သုံးကုန်တင်ယာဉ်တစ်စီး (မြေသယ်ကား)၊ လိုက်ထရပ် ၂ စီးဖြင့် ရောက်ရှိလာပြီး ရွာအတွင်းမှ စစ်ကောင်စီတပ်ကို ပြန်ခေါ်သွားကြောင်း အထက်ပါ ပကဖအဖွဲ့ဝင်ကပြောသည်။“ပြည်သူတွေရဲ့ စားနပ်ရိက္ခာတွေကို ကားနဲ့ တင်သွားတယ်။ သူတို့သယ်လို့မနိုင်တဲ့ မြေပဲတွေကို မီးရှို့သွားတာ။ ဒဏ်ရာရတဲ့သူတွေကို ကားနဲ့ လာပြီး သယ်တဲ့သဘောပဲဗျ” ဟု ဆိုသည်။ပြီးခဲ့သည့် ဖော်ဖော်ဝါရီ ၁၉ ရက်နေ့ကလည်း ကန့်ဘလူမြို့နယ် အရှေ့ခြမ်းရှိ မြေမွန်ရွာအနီးတွင် ပြည်သူ့ကာကွယ်ရေးတပ်နှင့် စစ်ကောင်စီတို့ တိုက်ပွဲဖြစ်ပွားပြီးနောက် မြေမွန်ရွာကို မီးတင်ရှို့ခဲ့ရာ ‌နေအိမ် ၅၀ ခန့် မီးလောင်ပျက်စီးသွားခဲ့သည်။စစ်ကောင်စီတပ်သည် ခုခံမှုပြင်းထန်သည့် ဒေသများတွင် အရပ်သားပစ်မှတ်များ၊ လူနေအိမ်များကို တိုက်ခိုက် ဖျက်ဆီးလေ့ရှိရာ အာဏာသိမ်းပြီး နှစ်နှစ်အတွင်း တစ်နိုင်ငံလုံးမှ နေအိမ်ပေါင်း ၅၅၄၈၄ လုံး မီးလောင် ပျက်စီးခဲ့ကြောင်း အရပ်ဘက်အချက်အလက်ကောက်ယူသည့် Data For Myanmar အဖွဲ့ မှတ်တမ်းများအရ သိရသည်။