ရန်ကုန်တိုင်းမှာ ကိုယ်ပိုင်ပြဋ္ဌာန်းခွင့်ရှိတဲ့ ဥပဒေပေါ်ပေါက်ဖို့ ကြိုးစားမယ်လို့ CRYH ပြော

အောင်သိင်္ခ (ဝါရှင်တန်ဒီစီ)
2023.02.22 RFA

ရန်ကုန်မြို့လယ် ဆူးလေဘုရားလမ်းကို ၂၀၂၁ ခုနှစ် စက်တင်ဘာလ ၇ ရက်နေ့က တွေ့ရစဉ်။RFA

ရန်ကုန်တိုင်းအနေနဲ့ ကိုယ်ပိုင်ပြဋ္ဌာန်းခွင့်ရှိတဲ့ အခြေခံဥပဒေတစ်ရပ် ပေါ်ပေါက်လာဖို့အတွက် ဆက်လက်ကြိုးစားသွားမှာဖြစ်တယ်လို့ ရန်ကုန်တိုင်းဒေသကြီး လွှတ်တော်ကိုယ်စားပြုကော်မတီဝင် အမျိုးသားဒီမိုကရေစီအဖွဲ့ချုပ် လှိုင်သာယာမြို့နယ် လွှတ်တော်ကိုယ်စားလှယ် ဦးမြတ်မင်းသူက ပြောလိုက်ပါတယ်။

၂၀၂၃ ခုနှစ် ဖေဖော်ဝါရီ ၂၂ ရက်နေ့မှာ အွန်လိုင်းက ကျင်းပတဲ့ ရန်ကုန်တိုင်းဒေသကြီး လွှတ်တော်ရဲ့ဆောင်ရွက်ချက် နှစ်နှစ်ပြည့် ပြည်သူတွေကို တင်ပြတဲ့ အခမ်းအနားမှာ အခုလို ထည့်သွင်းပြောကြားခဲ့တာပါ။

"ရန်ကုန်တိုင်းသည် ကိုယ်ပိုင်ပြဋ္ဌာန်းခွင့် ရှိသော အခြေခံဥပဒေတစ်ရပ် ဖြစ်ထွန်း ပေါ်ပေါက်လာရေး ဆက်လက် ကြိုးပမ်းအကောင်အထည်ဖော် ဆောင်ရွက်သွားမည်ဖြစ်သည်။ ရန်ကုန်တိုင်းလွှတ်တော် ကိုယ်စားပြုကော်မတီ ပြည်သူ့ရေးရာ စီမံခန့်ခွဲရေးအဖွဲ့က ကြားကာလ ဒေသန္တရပြည်သူ့အုပ်ချုပ်ရေးလုပ်ငန်းစဉ်များ ပီပီပြင်ပြင် ပေါ်ပေါက် လာရေးအတွက် လွှတ်တော်ကိုယ်စားလှယ်များ မြို့နယ်ပြည်သူ့အုပ်ချုပ်ရေး အဖွဲ့များနဲ့ ညှိနှိုင်း ပေါင်းစပ်လျက် အသွင်ကူးပြောင်းရေးကာလ အုပ်ချုပ်ရေးစနစ် ခိုင်မာအားကောင်းလာစေရေးကို ဆက်လက်အကောင်အထည် ဖော်ဆောင်ရွက်သွားမည်ဖြစ်သည်" လို့ NLD လွှတ်တော်ကိုယ်စားလှယ် ဦးမြတ်မင်းသူက ပြောပါတယ်။

ရန်ကုန်တိုင်းဒေသကြီး လွှတ်တော်ကိုယ်စားပြုကော်မတီ CRYH ဟာ ၂၀၀၈ ဖွဲ့စည်းပုံ အောက်ကပေါ်လာတဲ့ ကော်မတီဖြစ်တဲ့အတွက် ရန်ကုန်တိုင်းအတွင်း ကိုယ်ပိုင်ပြဋ္ဌာန်းခွင့် ပိုရအောင်လုပ်မယ်ဆိုတာဟာ ၂၀၀၈ အခြေခံဥပဒေကို ပြန်အသိအမှတ်ပြုရာ ရောက်တယ်လို့ နိုင်ငံရေးလေ့လာသုံးသပ်သူ ဦးရဲထွန်းက ပြောပါတယ်။

"၂၀၀၈ အခြေခံဥပဒေအရ ပေါ်လာတဲ့ ရန်ကုန်တိုင်းလွှတ်တော်ကိုယ်စားပြုကော်မတီဆိုပြီးတော့ လုပ်မှာဆိုရင် ၂၀၀၈ ကို ပြန်အသိအမှတ်ပြုပြီးတော့ ၂၀၀၈ ပြင်ဆင်ရေးကို ပြောနေတဲ့ အဓိပ္ပါယ်မျိုး ပြန်ဖြစ်နေတာပေါ့ဗျာ။ ဘယ်လောက် အဓိပ္ပါယ်မဲ့မလဲ၊ ဘယ်လောက်ခက်ခဲမလဲ ဆိုတာတွေးကြည့်လို့ရတာပေါ့နော်"

CRYH အနေနဲ့ အခုလို ကိုယ်ပိုင်ပြဋ္ဌာန်းခွင့်ရှိတဲ့ အခြေခံဥပဒေတစ်ရပ် ရေးဆွဲမယ်ဆိုရင်အမျိုးသားညီညွတ်ရေးအစိုး
ရNUG၊ အမျိုးသား ညီညွတ်ရေးအတိုင်ပင်ခံကောင်စီ NUCC တို့နဲ့ စကားပြောဖို့ လိုအပ်လိမ့်မယ်လို့လည်း ဦးရဲထွန်းက ပြောပါတယ်။

၂၀၀၈ ဖွဲ့စည်းပုံအောက်ကကျင်းပတဲ့ ရွေးကောက်ပွဲဖြစ်တဲ့ ၂၀၂၀ ခုနှစ် ရွေးကောက်ပွဲရလဒ် ပျက်ပြယ်သွားပြီ လို့ ဝေဖန်ပြောဆိုနေကြတာဟာ စစ်ကောင်စီရဲ့ အလိုအတိုင်း ဖြစ်သွားနိုင်တာကို သတိပြုကြဖို့ သဘာပတိ အဖြစ်ဆောင်ရွက်ခဲ့တဲ့ ဗိုလ်တထောင်မြို့နယ် တိုင်းဒေသကြီး လွှတ်တော်ကိုယ်စားလှယ် ဦးတင့်လွင်က အခမ်းအနားမှာ ပြောပါတယ်။

"တကယ်တော့ ၂၀၂၀ ရွေးကောက်ပွဲရလဒ်ဟာ အာဏာရှင်စနစ် အခြေပြုတဲ့ ဖွဲ့စည်းပုံသစ်ပင်ကနေ ပြည်သူများက လိမ္မာပါးနပ်စွာ ခူးရင်းရရှိထားတဲ့ ဒီမိုကရေစီအသီးအပွင့် ဖြစ်ပါတယ်။ အာဏာရှင်အခြေပြု သစ်ပင်ကို အခွင့်သင့်တဲ့အခါမှာ ခုတ်လှဲနိုင်ခဲ့တဲ့အခါမှာ ပြည်သူ့လက်ထဲက ဒီမိုကရေစီ အသီးအပွင့်ဟာလည်း ပျက်ပြယ်သွားပြီလို့ မဆိုသင့်ပါဘူး ဒီအသီးအပွင့်ဖြစ်တဲ့ ပြည်သူရဲ့ အပ်နှင်းယုံကြည်မှုကို ရယူပြီးတော့ စစ်အုပ်စုဟာ ကျွန်တော်တို့က နိုင်ငံရေးနည်းအရ တိုက်ပွဲဝင်နေတာမျိုးဖြစ်ပါတယ်။ ဒါကိုပျက်ပြယ်သွားပြီလို့ ဆိုခြင်းဟာ ဘုံရန်သူဖြစ်တဲ့ စစ်အုပ်စုရဲ့ ဆန္ဒနဲ့တစ်ထပ်တည်း ဖြစ်နေတာကို ဝေဖန်သူများ သတိပြုစေလိုပါတယ်"

အမျိုးသားဒီမိုကရေစီအဖွဲ့ချုပ် NLD ပါတီအနေနဲ့ ၂၀၀၈ ဖွဲ့စည်းပုံ အခြေခံဥပဒေအောက်ကနေပြုလုပ်တဲ့ ရွေးကောက်ပွဲတွေကို ဝင်ရောက်ယှဉ်ပြိုင်ခဲ့ပေမယ့် ၂၀၀၈ ဖွဲ့စည်းပုံကိုတော့ မထောက်ခံခဲ့ဘူးလို့လည်း ဦးတင့်လွင်က ပြောပါတယ်။

၂၀၀၈ ဖွဲ့စည်းပုံ အခြေခံဥပဒေကို ဖျက်သိမ်းကြောင်း ၂၀၂၁ ခုနှစ် မတ်လ ၃၁ ရက်နေ့မှာပြည်ထောင်စု လွှတ်တော် ကိုယ်စားပြုကော်မတီ CRPH က ကြေညာခဲ့ပါတယ်။

ရန်ကုန်တိုင်းအတွင်း မြို့နယ်ပြည်သူ့အုပ်ချုပ်ရေးအဖွဲ့တွေ အင်အားတောင့်တင်းခိုင်မာလာနေသလို ပိုမိုအားကောင်းဖို့အတွက် ပြည်သူ့အုပ်ချုပ်ရေးအဖွဲ့၊ ပြည်သူ့ကာကွယ်ရေးတပ်ဖွဲ့ PDF တွေ၊ တတ်သိပညာရှင်တွေနဲ့ အားဖြည့် ဖွဲ့စည်းပြီး ဖြစ်တယ်လို့ ဗိုလ်တထောင်မြို့နယ် တိုင်းဒေသကြီးလွှတ်တော်ကိုယ်စားလှယ် ဒေါ်လဲ့လဲ့ဝင်း က ပြောပါတယ်။

"အမျိုးသားညီညွတ်ရေးအစိုးရ ပြည်ထဲရေးနဲ့လူဝင်မှုကြီးကြပ်ရေး ဝန်ကြီးဌာန လမ်းညွှန်ချက်နဲ့အညီ ရန်ကုန်တိုင်းအတွင်းရှိ မြို့နယ်ပြည်သူ့အုပ်ချုပ်ရေး အဖွဲ့များ အင်အားတောင့်တင်း ခိုင်မာလာပြီး လုပ်ငန်းယန္တရား အားကောင်းလာစေရန်အတွက် ပြည်သူ့အုပ်ချုပ်ရေးအဖွဲ့များကို ပြည်သူ့ကာကွယ်ရေး အဖွဲ့ဝင်များ ပြည်သူ့လုံခြုံရေးအဖွဲ့ဝင်များ ဒေသအတွင်းရှိ တတ်သိပညာရှင်များနှင့် အောင်မြင်စွာ ပြင်ဆင်အားဖြည့်ဖွဲ့စည်းပြီးလည်း ဖြစ်ပါသည်"

ရန်ကုန်တိုင်းလွှတ်တော်ကိုယ်စားပြုကော်မတီ ပြည်သူ့ရေးရာ စီမံခန့်ခွဲရေးကော်မတီရဲ့အစီရင်ခံစာဖတ်ကြားချိန်မှာ ဒေါ်လဲ့လဲ့ဝင်း အခုလို ထည့်သွင်းပြောသွားခဲ့တာပါ။

ဒီအခမ်းအနားကို တက်ရောက်တဲ့ ပြည်ထောင်စုလွှတ်တော်ကိုယ်စားပြုကော်မတီဥက္ကဋ္ဌ ဦးအောင်ကြည်ညွန့်က အမျိုးသားဒီမိုကရေစီ NLD ပါတီဝင် လွှတ်တော်ကိုယ်စားလှယ်တွေဟာ ပြည်သူတွေက ပေးအပ်တဲ့တာဝန်ကို အသက်တွေ၊ ဘဝတွေ ရင်းပြီး ရပ်တည်ဆောင်ရွက်သွားမှာ ဖြစ်တယ်လို့ ပြောပါတယ်။

"တကယ်တမ်း ပြည်သူ့ရဲ့ အာဏာကို ဘယ်လိုမတရားမှုမျိုးနဲ့မှ ရယူထိန်းသိမ်းတာကို ဘယ်တော့မှ လွယ်လွယ်ကူကူ လက်မြှောက် အရှုံးပေးမှာ မဟုတ်ဘူး။ ပြည်သူတွေက ပေးအပ်တဲ့ တာဝန်တွေကို ကျွန်တော်တို့ရဲ့ ဘဝတွေ အသက်တွေ ရင်းနှီးပြီးတော့ ရပ်တည်ဆောင်ရွက်သွားဖို့ရန်အထိလည်း ဝန်မလေးဘူးဆိုတာကို ဒီကနေ့ တကယ်တမ်း မြန်မာပြည်တွင်းထဲမှာ အသက်တွေဘဝတွေ စည်းစိမ်ဥစ္စာတွေ မှန်သမျှပေးဆပ်ပြီးတော့ အခု အချိန်အထိ ကြံကြံခိုင်ခိုင် ရင်ဆိုင်နေကြတဲ့ ပြည်သူတွေနဲ့ တစ်သားတည်း ရှိနေတယ်ဆိုတာကို ပြသခြင်းဖြစ်တယ်လို့ ကျွန်တော့်အနေနဲ့ ယုံကြည်ပါတယ်"

၂၀၂၁ ခုနှစ် ဖေဖော်ဝါရီ ၁ ရက်ကနေ ၂၀၂၃ ခုနှစ် ဖေဖေါ်ဝါရီ ၂၂ ရက်နေ့အထိ ရန်ကုန်တိုင်းဒေသကြီး လွှတ်တော်ကိုယ်စားလှယ် ၆ ဦးဖမ်းဆီးခံရတယ်လို့ တိုင်းဒေသကြီး လွှတ်တော်ကိုယ်စားလှယ် ဒေါ်ခိုင်မာဌေးက ပြောခဲ့ပါ တယ်။

ရန်ကုန်တိုင်း ဒေသကြီး လွှတ်တော် ကိုယ်စားပြု ကော်မတီရဲ့ ရှေ့လုပ်ငန်းစဉ်တွေနဲ့ ပတ်သက်ပြီးမှတ်ချက်ရနိုင်ဖို့ ရန်ကုန်တိုင်း စစ်ကောင်စီ ပြောရေးဆိုခွင့်ရှိသူ ဦးဌေးအောင်နဲ့ စစ်ကောင်စီပြောခွင့်ရှိသူ ဗိုလ်ချုပ် ဇော်မင်းထွန်းကို ဖုန်းနဲ့ဆက်သွယ်ပေမယ့် ဆက်သွယ်လို့ မရခဲ့ပါဘူး။

ဒီနေ့ အခမ်းအနားမှာ အုပ်ချုပ်ရေးကဏ္ဍ ဖြည့်ဆည်းပေးနိုင်ဖို့အတွက် ရန်ကုန်တိုင်းအတွင်း ပြည်သူ့အုပ်ချုပ်ရေးအဖွဲ့ (ပအဖ)ဖွဲ့စည်းမှုတွေ၊ CDM လှုပ်ရှားမှုမှာ ပါဝင်တဲ့ ဝန်ထမ်းတွေကို ကူညီဆောင်ရွက်ပေးခဲ့တဲ့ အခြေအနေတွေ၊ ကြားကာလ ပညာရေးဆိုင်ရာ ဆောင်ရွက်ချက်တွေ၊ ဒီမိုကရေစီအရေးလှုပ်ရှားမှုကြောင့် အကျဉ်းကျခံနေရသူတွေကို ဥပဒေကြောင်းအရ ကူညီပေးခဲ့တာတွေနဲ့ ကိုဗစ်ကာလ မြို့နယ် ၁၆ မြို့နယ်အတွက် ထောက်ပံ့ငွေပေးအပ်ခဲ့တဲ့ အခြေအနေတွေကို တင်ပြခဲ့ကြပါတယ်။

စစ်အာဏာသိမ်းပြီး ၂၀၂၁ ခုနှစ် ဖေဖော်ဝါရီလ ၈ ရက်နေ့မှာ ရန်ကုန်တိုင်းလွှတ်တော်ကိုယ်စားပြုကော်မတီကို စတင်ဖွဲ့စည်းခဲ့တာ ဖြစ်ပါတယ်။