ညောင်လေးပင်မြို့နယ်တိုက်ပွဲစစ်ကောင်စီတပ်(၁၀)ခန့်သေပြီး PDF ရဲဘော်တစ်ဦးကျ

စစ်တပ်က လက်နက်ကြီးဖြင့် ရမ်းသမ်းပစ်၍ ပြည်သူသုံးဦး အပြင်းအထန်ဒဏ်ရာရ

ကျော်ဇော၊​မောင်​မောင်/People's Spring 

ပဲခူးတိုင်း ညောင်လေးပင်မြို့နယ်တွင် စစ်ကောင်စီတပ်နှင့် ပြည်သူ့ကာကွယ်ရေးတပ်မတော် PDF တပ်ဖွဲ့များကြား နှစ်ဖက်ထိတွေ့တိုက်ပွဲဖြစ်ပွားခဲ့ကြောင်း ဒေသခံများက People's Spring သတင်းဌာနသို့ပြောကြားသည်။
ယမန်နေ့(ဖေဖော်ဝါရီ ၂၁)နံနက် ၅ နာရီကျော်တွင် ညောင်လေးပင်မြို့နယ် ပုဇွန်မြောင်ကျေးရွာဘက်သို့ စစ်ကြောင်းထိုးလာသော စစ်ကောင်စီတပ်ကို ပဲခူးခရိုင် PDF တပ်ရင်း ၃၇၀၂၊ တပ်ခွဲ ၄၊ တပ်စု ၃ မှ တော်လှန် ရေးရဲဘော်များက သွားရောက်တိုက်ခိုက်ခဲ့ခြင်းဖြစ် ကြောင်း PDF တပ်ဖွဲ့များနှင့် နီးစပ်သည့်ဒေသခံသတင်းရင်းမြစ်ကပြောသည်။
"မနက် ၅ နာရီလောက်မှာ PDF တပ်ဖွဲ့ကဝင်ရောက်တိုက်ခိုက်ရာမှာနှစ်ဖက်ထိခိုက်မှုရှိပါတယ်။PDFဖက်က တပ်သားတစ်ဦးကျဆုံးခဲ့ပါတယ်။ စကစဖက်က ၁၀ ယောက်ကျော်ကျမယ်လို့ ခန့်မှန်းပါတယ်"ဟု အဆိုပါဒေသခံကပြောသည်။
အဆိုပါ ညောင်လေးပင်မြို့နယ်တွင်း ထိတွေ့တိုက်ပွဲနှင့်စပ်လျဥ်းပြီး NUG အစိုးရ၊ ကာကွယ်ရေးဝန်ကြီးဌာနက ​ဖေ​ဖောဝါရီ ၂၁ ရက်ညတွင်စစ်ရေးသတင်းအကျဥ်းချုပ်ထုတ်ပြန်ရာတွင် နှစ်ဖက်တိုက်ပွဲအတွင်း ရန်သူ့တပ်သား (၁၀)ဦးကျော်သေဆုံးကြောင်းဖော်ပြထားသည်။
တိုက်ပွဲဖြစ်ပွားပြီး ၂ နာရီခန့်အကြာ ယမန်နေ့နံနက် ၇ နာရီခန့်တွင် ရွှေကျင်ဘက်မှနေ၍ ကားနှစ်စီးဖြင့်ရောက်ရှိလာသော စစ်ကောင်စီတပ်က အင်းဝိုင်းကြီးနှင့် ပုဇွန်မြောင်ရွာကြားတွင်ခေတ္တအထိုင်ချပြီး ကွင်းဒလကြီး၊ သက္ကယ်ကုန်း၊ မှော်ဗျား၊ အင်းဝိုင်ကြီး၊ ကွင်းဒလလေး၊ ထောင်လောင်စသည့် ကျေးရွာများသို့ လက်နက်ကြီးများဖြင့် ရမ်းသမ်းပစ်ခတ်ခဲ့သည်ဟု ဒေသခံများက​ပြောသည်။
အဆိုပါ လက်နက်ကြီးပစ်ခတ်မှုများကြောင့် အင်းဝိုင်းကြီးကျေးရွာ ဘုန်းတော်ကြီးကျောင်းမှ သိမ်ကျောင်း ဆောင်ထိခိုက်ပျက်ဆီးသွားပြီး ထောင်လောင်ရွာမှ နေအိမ်တစ်လုံးပေါ် လက်နက်ကြီးကျည် ကျရောက် ပေါက်ကွဲခဲ့ကြောင်း ဒေသခံများက ပြောသည်။
"ထောင်လောင်ကျေးရွှာမှ အမျိုးသမီးတစ်ဦးကျောကုန်းဒဏ်ရာပြင်းထန်၊ အမျိုးသားတစ်ဉီးခြေထောက်တစ်ဖက်စတီးရိုးထည့်ထားရ၊ အမျိုးသားတစ်ဉီးလက်မောင်းထိ ခိုက်မစိုးရိမ်ရ ဒဏ်ရာတွေရခဲ့ပါတယ်။ ခုလက်ရှိသုံးယောက်စလုံး ပဲခူးဆေးရုံတက်ရောက်ကုသနေရပါတယ်။ သုံးဦးသေတယ်ဆိုတာ မဟုတ်ပါဘူး"ဟု ညောင်လေးပင်မြို့နယ်မှ ဒေသခံတစ်ဦးက People's Spring သို့ ပြောသည်။
လက်ရှိအခြေအနေတွင် တိုက်ပွဲဖြစ်ပွားရာအနီးဝန်းကျင်ကျေးရွာများဖြစ်သော ညောင်ပင်ကြီး၊ အင်းဝိုင်းကြီး၊ ကွင်းဒလကြီး၊ ကွင်းဒလလေး၊ ပုဇွန်မြောင် စသည့်ကျေး ရွာများမှ ဒေသခံပြည်သူအချို့ ဘေးလွတ်ရာရှောင်နေသူများရှိသလို ကျေးရွာများအတွင်း ကျန်ရှိနေသူများမှာ စိုးရိမ်ထိတ်လန့်မှုများရှိနေကြကြောင်း စုံစမ်းသိရသည်။


ဖရူဆိုနှင့် ရှားတောရှိ စစ်ကောင်စီအခြေစိုက်စခန်းများကို တိုက်ခိုက်

ရဲခေါင်/People's Spring

ကရင်နီ(ကယား)ပြည်နယ်၊ ဖရူဆိုနှင့် ရှားတော မြို့နယ်ရှိ စစ်ကောင်စီ၏ အခြေစိုက်စခန်းများကို တိုက်ခိုက်ရာ စစ်ကောင်စီဘက်မှ ထိခိုက်သေဆုံးမှုရှိကြောင်း ကရင်နီစစ်ဖက်ဆိုင်ရာဗဟိုသတင်း ထုတ် ပြန်ရေးအဖွဲ့ KMICက ပြောသည်။
ဖေဖော်ဝါရီ၂၀ ရက် နံနက် ၈ နာရီခန့်က ရှားတောမြို့အနီရှိ စစ်ကောင်စီ၏ ခမရ (၅၁၀)တပ်၏ မြို့တွင်းစခန်းကို ကရင်နီတပ်မတော်(KA)နှင့် ကရင်နီအမျိုးသားများကာကွယ်ရေးတပ် (KNDF)တို့ပူးပေါင်း တိုက်ခိုက်ခဲ့သည်ဟု ဆိုသည်။
ထိုတိုက်ခိုက်မှုတွင် စစ်ကောင်စီဘက်မှ ထိခိုက် သေဆုံးမှုကို KMIC က စုံစမ်းဆဲဖြစ်ကြောင်း အသိပေး သည်။
အလားတူ ယခုလ ၁၆ ရက်တွင် ဖရူဆိုအခြေစိုက် ခမရ (၅၃၁)တပ်အတွင်း ကရင်နီတပ်မတော်က ဝင် ရောက်တိုက်ခိုက်ရာ စစ်ကောင်စီတပ်သားတစ်ဦး သေဆုံးကြောင်း ဖော်ပြသည်။
ထို့ကြောင့် ယမန်နေ့ကစ၍ စစ်ကောင်စီတပ်မှာ ဖရူဆိုမြို့အရှေ့ခြမ်းတစ်လျှောက် ကင်းထောက် ရဟတ်ယာဥ်ဖြင့် စစ်ကောင်စီက ထောက်လှမ်းလာသည်ဟု ဆိုသည်။
တိုက်ခိုက်မှု ဖြစ်စဥ်များတွင် စစ်ကောင်စီတပ်က လက်နက်ကြီး များအသုံးပြု ပစ်ခတ်ခဲ့သော်လည်း ကရင်နီပူးပေါင်းတပ်မှ ထိခိုက်သူမရှိခဲ့ပေ။
"မနေ့က ဒီးမော့ဆိုဘက်မှာလည်း တိုက်လေယာဥ်နှစ်စီး ပျံဝဲပြီးခြိမ်းခြောက်ပစ်ခတ်ခဲ့တာမျိုးရှိတယ်။အထိအခိုက်တော့ မသိပေးမယ်။သူတို့ ဘက်က အသေအဆုံးများရင် လေကြောင်း နဲ့ လက်နက် ကြီး ပစ်ကူက အဆမတန်ကို စစ်ကောင်စီက သုံးနေ တယ်"ဟု ကရင်နီစစ်ရေးသတင်းရင်းမြစ်က လူထုနွေဦးသို့ ပြောသည်။
ဖေဖော်ဝါရီ ၁၉ ရက်က ရှမ်း-ကရင်နီ နယ်စပ်တိုက်ပွဲတွင်လည်း စစ်ကောင်စီတပ်သား ငါးဦးဖမ်းဆီးရမိပြီး ခြောက်ဦးသေဆုံးကြောင်းနှင့်အတူ လက်နက်မျိုးစုံ(၁၀)လက်နှင့် ကျည်ဆံ၊ ခဲယမ်းများ ကို ကရင်နီတပ်မတော် KAက သိမ်းဆည်းရရှိခဲ့သည်။
PDF တပ်ရင်း ၃၇၀၂ မှတပ်ဖွဲဝင်အချို ။
ဓါတ်ပုံ-PDF